Як паведамляе Праваабарончы цэнтар «Вясна», вядомыя прозьвішчы затрыманых каля Цнянскага вадасховішча раварыстаў. Сама меней 14 чалавек зь іх на чатырох мікрааўтобусах павезьлі ў Савецкае РУУС Менску «для высвятленьня абставінаў». Да суду іх даставілі ў ізалятар на Акрэсьціна.
Затрыманыя — удзельнікі роварнага прабегу Toure de Tsna. Паведамляецца, што аднаго чалавека затрыманы за майку з надпісам «Анты-лукашэнка».
У ліку затрыманых Арцём Анцюх, Павал Бокшыц, Максім Ганін, Георгі Гашко, Ільля Загорнаў, Сяргей Зайкоўскі, Леанід Кузьміч, Уладзіслаў Кутас, Мацьвей Лазар, Юлія Нікіціна, Дзяніс Парамонаў, Канстанцін Сямёнаў, Дзяніс Рудкоўскі, Артур Чумак.
У Менску каля Камароўкі таксама затрымалі мясцовую жыхарку Алену Гаўрылаву. Яе даставілі ў Савецкае РУУС. Прычыны і абставіны затрыманьня пакуль невядомыя.
Таксама 16 мая ў Менску на вуліцы Сердзіча затрымалі лекара-кардыёляга Вольгу Карнееву. Яе, як мяркуецца, даставілі ў Фрунзенскае РУУС.
