Лінкі ўнівэрсальнага доступу

Прэзыдэнт Польшчы напісаў ліст зьняволеным актывістам Саюзу палякаў Беларусі


Плякат у падтрымку Анджэя Пачобута ў цэнтры Варшавы.

Анжаліка Борыс знаходзіцца ў зьняволеньні з 23 сакавіка, Анджэй Пачобут — з 25 сакавіка.

У лісьце з нагоды Дня Палёніі, які адзначаўся 2 траўня, прэзыдэнт Польшчы Анджэй Дуда выказаў сваю салідарнасьць з усімі людзьмі, якіх перасьледуюць у Беларусі паводле нацыянальных і палітычных прыкмет.

Ліст Анджэя Дуды з пажаданьнямі з нагоды Дня польскай дыяспары і палякаў за мяжой (Дня Палёніі) павінны атрымаць актывісты польскай нацыянальнай меншасьці ў Беларусі, якія апынуліся за кратамі ў Менску.

Прэзыдэнт Польшчы зьвярнуўся з лістом да арыштаваных актывістаў Саюзу палякаў Беларусі: Анжалікі Борыс, Ірэны Бярнацкай, Марыі Цішкоўскай і Анджэя Пачобута, а таксама да Ганны Панішавай – прэзыдэнта Форуму польскіх мясцовых ініцыятыў зь Берасьця.

У лісьце Анджэй Дуда выказвае сваю салідарнасьць з усімі людзьмі, якіх перасьледуюць у Беларусі па нацыянальных і палітычных прыкметах.

«Вы зьяўляецеся прыкладам еднасьці паміж палякамі ды беларусамі, якія ствараюць і змагаюцца за незалежную Беларусь. Палякі, што жывуць на Беларусі, ёсьць неад’емнай часткай беларускага грамадзтва, і яны паўнапраўныя грамадзяне Беларусі.

Таму яны маюць права на свабоду, каб далей будаваць незалежную і дэмакратычную Беларусь, а таксама дапамагаць кантактамі паміж нашымі дзяржавамі і народамі», — піша ў лісьце прэзыдэнт Польшчы Анджэй Дуда, які цытуе БАЖ.

Ліст накіраваны ў Менск, у СІЗА № 1, дзе знаходзяцца Анджэй Пачобут і іншыя прадстаўнікі польскіх арганізацый, затрыманыя ў сакавіку 2021 года.

Ліст Анджэя Дуды беларускім палітвязьням-палякам.
Ліст Анджэя Дуды беларускім палітвязьням-палякам.

10 сакавіка сілавікі завялі крымінальную справу за правядзеньне імпрэзы ў польскай сацыяльнай школе скаўтаў імя Рамуальда Траўгута ў Берасьці. Тады затрымалі сузаснавальніка школы, 43-гадовага берасьцейца, і дырэктарку Ганну Панішаву. Пазьней стала вядома аб ператрусах у Лідзе, Ваўкавыску і затрыманьнях Ірэны Бярнацкай і Марыны Цішкоўскай.

23 сакавіка ў Горадні затрымалі Анжаліку Борыс, а яшчэ праз два дні — Анджэя Пачобута.

Усіх арыштаваных у «Польскай справе» праваабаронцы прызналі палітычнымі зьняволенымі. Санкцыя крымінальнага артыкула прадугледжвае ад 5 да 12 гадоў пазбаўленьня волі.

Як разьвіваўся беларуска-польскі канфлікт

  • 2 кастрычніка 2020 году беларускі МЗС запатрабаваў скараціць колькасьць польскіх і літоўскіх консулаў у Беларусі. Да 9 кастрычніка зь Беларусі выехалі 32 польскія дыпляматы.
  • 29 кастрычніка Лукашэнка абвінаваціў Польшчу ў распальваньні рэвалюцыі ў Беларусі, а польскага прэзыдэнта Анджэя Дуду — у фальсыфікацыі выбараў.
  • 21 сьнежня Беларусь закрыла межы на ўезд і выезд, у тым ліку з Польшчай. Афіцыйная прычына — каранавірус.
  • 12 сакавіка 2021 году на беларуска-польскай мяжы затрымалі дырэктарку прыватнай польскай школы ў Берасьці Ганну Панішаву. На яе завялі справу за «распальваньне нацыянальнай або рэлігійнай варажнечы» (частка 3 артыкул 130 КК). Яна знаходзіцца пад вартай.
  • 13 сакавіка на запатрабаваньне беларускіх уладаў з Горадні выехалі яшчэ два польскія консулы, у тым ліку, генэральны консул Польшчы ў Горадні Яраслаў Ксёнжэк. Прычыны — польскі консул прыняў удзел у імпрэзе памяці «праклятых жаўнераў» у Берасьці. У Горадні застаўся апошні польскі консул. У адказ Польшча паведаміла, што высылае ў Беларусь двух беларускіх консулаў.
  • 23 сакавіка ў Горадні затрымалі старшыню незарэгістраванага Саюзу палякаў Беларусі (СПБ) Анжаліку Борыс.
  • 24 сакавіка Анжаліку Борыс асудзілі на 15 сутак адміністрацыйнага арышту за правядзеньне ў Горадні традыцыйнага сьвята Казюкі.
  • 25 сакавіка затрымалі сябраў незарэгістраванага СПБ Анджэя Пачобута (Горадня), Ірэну Бярнацкую (Ліда), Марыю Цішкоўскую (Ваўкавыск).
  • Генэральная пракуратура завяла крымінальную справу «за распальваньне рэлігійнай і нацыянальнай варажнечы» (частка 3 артыкулу 130 КК) на Анжаліку Борыс і іншых асобаў. Борыс, Пачобут, Бярнацкая, Цішкоўская знаходзяцца на «Валадарцы» ў якасьці падазраваных.
  • 29 сакавіка стала вядома, што Смаргонская пракуратура запытвае сьпісы студэнтаў і выкладчыкаў курсаў польскай мовы. Запыт датаваны 25 сакавіка. Прыватныя школы польскай мовы паведамляюць, што праверкі ў іх ідуць па ўсёй Беларусі.
  • 31 сакавіка праваабаронцы прызналі Борыс, Пачобута, Бярнацкую, Цішкоўскую, Панішаву палітвязьнямі.
  • 6 красавіка Лукашэнка выставіў Польшчы прэтэнзіі ў тым, што яе ўлады абвінавачваюць афіцыйны Менск у фальсыфікацыі выбараў, а таксама «падтрымліваюць здраднікаў і экстрэмістаў».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG