У сувязі са шматлікімі выпадкамі парушэньня правоў чалавека і палітыкай рэпрэсій у Беларусі дэпутаты чэскага рэгіёну пастанавілі спыніць супрацоўніцтва з Магілёўскай вобласьцю, зь якой раней іх зьвязвала праграма тэрытарыяльных сувязяў. «Эўразьвяз выразна прадэманстраваў, што правы чалавека ў Беларусі парушаюцца, а правы чалавека — гэта нешта большае, чым мы тут думаем», — цытуе сайт impuls.cz намесьніка гетмана рэгіёну Іржы Жэгака.
Мясцовыя камуністы запярэчылі было, што «не рэгіянальным уладам ацэньваць ступень дэмакратычнасьці ў краіне» і што, маўляў, няма чаго мяшаць палітыку ў супрацоўніцтва тэрыторыяў, аднак засталіся ў меншасьці.
Двухаблічная пазыцыя
Двухаблічную палітыку рэгіёну ў выпадку зь Беларусьсю скрытыкаваў прадстаўнік апазыцыі Штэфан Дрозд. Ён нагадаў, што вобласьць скарачае супрацоўніцтва з Магілёўшчынай, але закупляе 90 аўтобусаў зь Беларусі для Транспартнай кампаніі Устэцкага краю.
Транспартнікі пярэчаць, што тэндэр на закуп аўтобусаў МАЗ зь Беларусі праводзіўся яшчэ ў леташнім сакавіку, пастаўшчык адпавядаў усім крытэрам, прапанаваў добрую цану, і хоць цяпер Транспартнай кампаніі закідаюць падтрымку рэжыму ў Беларусі, але кампанія павінна выканаць Закон аб дзяржаўных закупках, бароняць сваю пазыцыю транспартнікі.
Чэская Рэспубліка — адзін з самых пасьлядоўных крытыкаў рэпрэсіўнай палітыкі ў Беларусі:
- яна разам з Эўразьвязам не прызнала вынікі прэзыдэнцкіх выбараў у Беларусі,
- адкрыла ў ВНУ шматлікія стыпэндыяльныя праграмы для пацярпелых беларускіх студэнтаў і выкладчыкаў,
- у рамках праграмы MEDEVAC прыняла на лячэньне параненых у мірных пратэстах,
- чэскія палітыкі пішуць лісты беларускім палітвязьням,
- на адміністрацыйных будынках Чэхіі вывешваюць бел-чырвона-белыя сьцягі на знак салідарнасьці,
- чэскі аўтамабільны канцэрн Škoda Auto адмовіўся спансаваць чэмпіянат сьвету па хакеі-2021, калі б ён часткова праходзіў у Беларусі. (У адказ афіцыйны Менск забараніў увоз у Беларусь прадукцыі Škoda Auto.)
