Прэмʼер-міністар Армэніі Нікол Пашыньян падаў у адстаўку, каб правесьці пазачарговыя парлямэнцкія выбары, паведаміла Армянская служба Радыё Свабода.
Ён заявіў, што будзе паўторна балятавацца на пасаду прэмʼер міністра.
Датэрміновыя выбары ў Армэніі плянуюць правесьці 20 чэрвеня. Да гэтага часу Пашыньян будзе выканальнікам абавязкаў прэмʼер-міністра.
Апазыцыя патрабавала адстаўкі Пашыньяна з моманту завяршэньня збройнага канфлікту ў Нагорным Карабаху леташняй восеньню. 10 лістапада пратэстоўцы нават захапілі будынкі парлямэнту і ўраду.
Пасьля гэтага ў Армэніі рэгулярна праходзілі акцыі пратэсту супраць прэмʼер-міністра, нягледзячы на тое, што ў краіне працягвае дзейнічаць ваеннае становішча, а разам зь ім — забарона на масавыя акцыі.
Апазыцыя абвінавачвае Пашыньяна ў пройгрышы канфлікту ў Карабаху. Паводле мірнай дамовы Баку вярнуў сабе значную частку тэрыторыі, занятай армянскімі войскамі на пачатку 90-х гадоў. Прыхільнікі прэмʼер-міністра сьцьвярджаюць, што адказнасьць за вайсковыя паразы разам з прэмʼерам павінны разьдзяліць вайскоўцы і былыя кіраўнікі краіны, якія не падрыхтавалі яе да вайны.
