Лінкі ўнівэрсальнага доступу

Турэччына крытычна зрэагавала на прызнаньне Вашынгтонам генацыду армян у Асманскай імпэрыі


Міністар замежных спраў Турэччыны Меўлют Чавушаглу

Турэччына крытычна адрэагавала на заяву прэзыдэнта ЗША Джо Байдэна аб прызнаньні генацыду армян падчас Першай сусьветнай вайны.

Як паведаміў у твітэры міністар замежных спраў Турэччыны, «словы ня могуць зьмяніць альбо перапісаць гісторыю».

«Мы ня можам даведацца пра сваю гісторыю ні ад каго. Палітычны апартунізм — найвялікшая здрада міру і справядлівасьці. Мы цалкам адхіляем гэтае выказваньне, якое заснавана выключна на папулізьме», — напісаў Меўлют Чавушаглу.

Раней МЗС Турэччыны папярэджваў, што калі Джо Байдэн прызнае забойствы армян генацыдам, гэта пагоршыць двухбаковыя адносіны паміж ЗША і Турэччынай.

24 красавіка прэзыдэнт ЗША Джо Байдэн у афіцыйнай заяве назваў забойствы армян у Асманскай імпэрыі падчас Першай сусьветнай вайны генацыдам.

Адносіны паміж Турэччынай і Армэніяй — вельмі напружаныя. Турэччына адкрыта падтрымала дзеяньні Азэрбайджану, які летась пачаў наступленьне ў Нагорным Карабаху, у выніку якога значная частка гэтага рэгіёну, які знаходзіўся больш за 30 гадоў пад армянскім кантролем, перайшла пад кантроль Баку.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG