Лінкі ўнівэрсальнага доступу

Суд адмовіўся павялічваць турэмны тэрмін для журналісткі Tut.by Барысевіч. Яе вызваляць празь месяц


Кацярына Барысевіч, архіўнае фота

2 сакавіка Кацярыне Барысевіч прысудзілі 6 месяцаў пазбаўленьня волі. Прысуд журналістцы Tut.by абскардзіла пракуратура.

Апэляцыю ў так званай «справе аб 0 праміле» разглядаў Менскі гарадзкі суд, працэс прайшоў у закрытым рэжыме. У выніку тэрмін зьняволеньня Кацярыне Барысевіч пакінулі ранейшым. Журналістку, якая цяпер знаходзіцца ў сьледчай турме Жодзіна, на працэс не прывезьлі.

Кацярыну Барысевіч затрымалі ўвечары 19 лістапада і абвінавацілі ў разгалошваньні лекарскай тайны. У той жа дзень затрымалі доктара лякарні хуткай мэдыцынскай дапамогі Андрэя Сарокіна, які расказаў Барысевіч пра адсутнасьць у крыві загінулага Рамана Бандарэнкі алькаголю. Абаім абвінавачаным пагражала да 3 гадоў пазбаўленьня волі, іх працэс праходзіў у закрытым рэжыме, нягледзячы на пратэсты саміх абвінавачаных і родных загінулага, якія на судзе заявілі, што ня маюць ніякіх прэтэнзій да лекара Сарокіна і журналісткі Барысевіч.

12 сакавіка пракуратура Менску абскардзіла прысуд Барысевіч, назваўшы яго «празьмерна мяккім».

«Пракуратура гораду Менску апратэставала ў апэляцыйным парадку вырак суду Маскоўскага раёну Менску аб падбухторваньні да выдаваньня мэдычнай тайны ў дачыненьні да рэдактара аддзелу ТАА „Тут Бай мэдыя“ Кацярыны Барысевіч празь мяккасьць прызначанага пакараньня», — гаварылася ў афіцыйным паведамленьні пракуратуры.

Паводле першага прысуду Кацярына Барысевіч мусіць выйсьці на свабоду 19 траўня. Цяпер яна знаходзіцца ў сьледчай турме Жодзіна.

Адвакаты Кацярыны Барысевіч у сваю чаргу таксама абскардзілі прысуд, яны настойваюць на невінаватасьці журналісткі.

Лекар Арцём Сарокін быў прызнаны вінаватым, аднак яго вызвалілі ў залі суду — яму прысудзілі два гады калёніі з адтэрміноўкай на адзін год. Абскарджваць свой прысуд лекар ня стаў.

Што вядома пра сьмерць Рамана Бандарэнкі

Раман Бандарэнка
Раман Бандарэнка
  • Невядомыя ў масках пачалі зразаць бел-чырвона-белыя стужкі ў двары на вуліцы Чарвякова ўвечары 11 лістапада.
  • Пасьля вэрбальнага канфлікту зь мясцовымі жыхарамі невядомыя пачалі нападаць і біць жыхароў. Каля 22:16 некалькі чалавек забралі і зьвезьлі на бусах, падобных да тых, якімі карыстаюцца сілавікі.
  • Паводле непацьверджанай інфармацыі, каля 1,5 гадзіны Бандарэнка знаходзіўся ў Цэнтральным РУУС Менску.
  • У 0:05 Раман Бандарэнка паступіў у лякарню хуткай мэдычнай дапамогі зь вялікім ацёкам мозгу, закрытай чэрапна-мазгавой траўмай, субдуральнымі гематомамі, ударамі, абдзірынамі.
  • Паводле лекараў, ён быў у затарможаным стане, але ў апэрацыйную яго ўжо прывезьлі ў коме. Апэрацыя цягнулася некалькі гадзін.
  • Раман быў у крытычным стане.
  • ​ГУУС Менгарвыканкаму сьцьвярджае, што міліцыя прыбыла на месца толькі пасьля здарэньня. Рамана знайшлі непрытомнага і выклікалі хуткую. Адзін са сьведак здарэньня расказаў Свабодзе, што міліцыя прыяжджала яшчэ тады, калі невядомыя зразалі стужкі, «аднак хутка зьехала, нічога не зрабіўшы».
  • Сьледчы камітэт заявіў, што мужчына быў пʼяны. Аднак мэдыкі гэтую заяву абверглі — у крыві Бандарэнкі алькаголю не было.
  • 19 лістапада затрымалі журналістку Tut.by Кацярыну Барысевіч і лекара Арцёма Сарокіна. Кацярына Барысевіч была аўтаркай артыкула, дзе гаварылася, што ў крыві загінулага Рамана Бандарэнкі не было алькаголю. Інфармацыю пра гэта ёй перадаў лекар Арцём Сарокін. Пачатак суду над імі прызначаны на 19 лютага.
  • 18 лютага 2021 году, на соты дзень пасьля сьмерці Рамана, Генпракуратура паведаміла яго маці Алене Бандарэнцы, што па факце сьмерці яе сына пачалі крымінальную справу.
  • 17 верасьня 2021 справу прыпынілі«з прычыны неўстанаўленьня асобы, якая падлягае прыцягненьню ў якасьці абвінавачанага».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG