З жыхаркі Гомля, якую пакаралі 105 днямі арышту, патрабуюць 1421 рубель за ўтрыманьне ў ізалятары

Яе сем разоў запар каралі арыштам на 15 сутак. Агулам атрымалася 105 сутак. На волю дзяўчына мае выйсьці 9 траўня.

Днямі маці Анастасіі Алена Міціна атрымала дакумэнты, што за першы месяц арышту дзяўчына ўжо вінная 406 рублёў — «за харчаваньне ў ІЧУ». Плюс за пратэрміноўку плацяжу налічылі яшчэ 40 рублёў. Агулам дзяўчына мусіць сплаціць 1421 рубель за «харчаваньне».

ГЛЯДЗІЦЕ ТАКСАМА:

«Гэта людажэрства!» У Гомлі Анастасіі Перавошчыкавай, якая сядзіць 90 сутак, дадалі яшчэ 15

«Як яна можа заплаціць грошы, калі яна сядзіць у іх дагэтуль? Я дні лічу да яе вызваленьня... Яна цяпер у Буда-Кашалёўскім ІЧУ. Перадачы прымаюць толькі раз на тыдзень. Наста трымаецца. Ёй вельмі дапамагаюць лісты, якія пішуць людзі», — кажа маці.

Дзяўчыну пачалі караць «суткамі» за таемныя акцыі пратэсту, якія нехта праводзіў у раёне, пасьля ператрусу, калі міліцыянты знайшлі ў яе кампутары макет раённага сьцяга.

ГЛЯДЗІЦЕ ТАКСАМА:

Абласны суд пакінуў у сіле рашэньне аб пакараньні Анастасіі Перавошчыкавай, якую арыштавалі на 105 сутак

«Мне міліцыянт з Навабеліцкага РАУС Гомля заявіў, што „больш няма на каго вешаць, апроч яе, бо ў некаторых дзеці, а іншыя зьехалі за мяжу“. Так ён патлумачыў тое, што Насьцю чарговы раз пакаралі арыштам», — расказвала ў лютым Алена Міціна.