18 лютага ў Смаргонях на Горадзеншчыне агучылі прысуд Інэсе Маркавай і Руслану Валюку ў крымінальнай справе за паклёп на міліцыянтаў. Іх асудзілі на 2 гады «хатняй хіміі» і «хіміі» адпаведна, нагадвае «Вясна».
Пасьля абвяшчэньня прысуду ў калідоры нехта крыкнуў «Жыве Беларусь!». Вокліч у суседняй залі пачула старшыня смаргонскага суду Людміла Пятрова. На яе патрабаваньне выклікалі міліцыянтаў, якія затрымалі некалькі чалавек. На ўсіх склалі пратаколы паводле арт. 23.24 КаАП за несанкцыянаванае пікетаваньне ў судзе. Акрамя таго, пачалі крымінальную справу паводле артыкулу 339 «Хуліганства».
Суды праходзілі цягам двух месяцаў у Астраўцы (так вырашыў абласны суд). За гэты час асудзілі 10 смаргонцаў. Натальлю Путырскую і Ніну Шыш аштрафавалі на 870 рублёў кожную, Людмілу Сульжыцкую асудзілі на 10 сутак, Яўгена Новікава — на 12, Сяргея Трая — на 15, Яўгена Мацкевіча — на 15.
Пакаралі 10-дзённым арыштам і ўжо асуджанага Руслана Валюка, а ягоную маці аштрафавалі за «незаконны пікет» 18 лютага — 1450 рублёў. Штраф на 580 рублёў прысудзілі Андрэю Маркаву, брату Інэсы Маркавай. Апраўдальны вырак толькі ў Натальлі Ковель.
Затрымлівалі ў гэтай справе таксама выдаўца Рамуальда Ўлана — цяпер палітвязень адбывае «хімію» ў Гомлі.
Акрамя таго, за гэты час зь Беларусі дэпартавалі грамадзяніна Расеі Ільлю Петунова.
