Дэманстранты пачалі зьбірацца ў суботу раніцай у парку каля плошчы Юзэфа Пілсудскага, дзе ўсталяваны помнік загінулым. Звычайна там афіцыйныя асобы ўскладаюць кветкі і запальваюць сьвечкі ў гадавіну трагедыі.
Некаторыя з дэманстрантаў былі са сьцягамі з лягатыпам «Страйкі прадпрымальнікаў», сьцягамі ў нацыянальных колерах і з жоўтымі цюльпанамі, перавязанымі чорнымі стужкамі. Некалькі чалавек па чарзе вазілі тачку з лялькай, на галаве якой была фатаграфія Яраслава Качынскага.
Удзельнікі акцыі выкрыквалі антыўрадавыя лёзунгі накшталт «Далоў дыктатарскую качку», кідалі дымавыя шашкі і пэтарды.
Паліцыя не дазволіла пратэстоўцам увайсьці на плошчу Пілсудзкага і сарваць афіцыйныя ўрачыстасьці. Уваходы ахоўвалі буйныя сілы паліцыі, у парку стаялі конныя патрулі. Пазьней адбыліся сутыкненьні пратэстоўцаў з паліцыяй, некалькі чалавек былі затрыманыя.
Пракуратура Польшчы паведаміла аб працягу расьсьледаваньня Смаленскай катастрофы, у якой загінуў прэзыдэнт Лех Качынскі, да 31 сьнежня 2021 году.
За год да таго ў адказ на пытаньне журналістаў пракуратура паведаміла, што расьсьледаваньне знаходзіцца на вырашальным этапе.
Катастрофа пад Смаленскам адбылася 10 красавіка 2010 году непадалёк ад аэрадрому «Паўночны». Польскі ўрадавы самалёт Ту-154 каля разьбіўся ў дрэнных умовах надвор’я.
У катастрофе загінула 96 чалавек, у тым ліку прэзыдэнт Лех Качынскі. Польская дэлегацыя накіроўвалася на мерапрыемствы з нагоды 70-й гадавіны Катынскай трагедыі.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў