Падзеі 9 красавіка ў беларускай і сусьветнай гісторыі.
Гэты дзень у гісторыі
1865 — завяршэньне грамадзянскай вайны ў ЗША, капітуляцыя арміі Поўдня пры Апатамаксе.
1932 — скончыўся Барысаўскі галодны бунт, антысавецкі выступ працоўных Барысава.
1940 — уварваньне нацысцкай Нямеччыны ў Нарвэгію і Данію.
1946 — у нямецкім Міхельсдорфе з ініцыятывы Натальлі Арсеньневай і Юркі Віцьбіча створанае Беларускае літаратурнае згуртаваньне «Шыпшына».
1989 — разгон дэманстрацыі ў Тбілісі, які суправаджаўся забойствам маніфэстантаў.
1991 — Грузія абвясьціла незалежнасьць.
2003 — войскі міжнароднай кааліцыі, кіраванай ЗША, занялі Багдад.
2015 — Ва Ўкраіне завялі некалькі крымінальных спраў у дачыненьні да экс-прэзыдэнта Віктара Януковіча. Пячэрскі раённы суд Кіева завочна арыштаваў яго.
У гэты дзень нарадзіліся
1802 — Эліяс Лёнрат, фінскі фальклярыст, які запісаў і выдаў карэла-фінскі эпас «Калевала».
1821 — Шарль Бадлер, францускі паэт.
1910 — Ісай Казінец, адзін з кіраўнікоў менскага антынацысцкага падпольля падчас Другой усясьветнай вайны.
1934 — Леанід Асядоўскі, беларускі мастак.
1939 — Барыс Родзіч, удзельнік адраджэнскага руху канца 1989-х і пачатку 1990-х.
Ён засноўваў разам зь Міхасём Ткачовым, Алегам Трусавым, Міхасём Чарняўскім Беларускую сацыял-дэмакратычную Грамаду. Ствараў на сваім заводзе суполкі Таварыства беларускай мовы і Свабоднага прафсаюзу.
Стаў адным з заснавальнікаў мэмарыяльнага фонду «Трасьцянец»…
Яшчэ за савецкім часам у яго можна было разжыцца «Расійска-крыўскім слоўнікам» Вацлава Ластоўскага і выдадзеным замежнымі суайчыньнікамі «Кароткім аглядам гісторыі Беларусі», што разбураў савецкія гістарыяграфічныя міты.
Родзіч вельмі даражыў суседзтвам і знаёмствам з Васілём Быкавым, зь якім быў у адной суполцы Беларускага Народнага Фронту.
Уладзімер Арлоў, Імёны Свабоды, 4-е выданьне.
1966 — Алесь Ліпай, беларускі журналіст і паэт.
У 1991-м Ліпай заснаваў першае ў краіне незалежнае інфармацыйнае агенцтва БелаПАН, якое перарасло ў кампанію з запатрабаваным у Беларусі і за мяжой мультымэдыйным кантэнтам. Ён стаў аўтарам беларускага перакладу падпісанай Станіславам Шушкевічам і Білам Клінтанам Дамовы пра вывад зь Беларусі ядравай зброі. Перавёз з-за мяжы амаль паўтары тысячы кніг, выдадзеных беларускай дыяспарай.
Уладзімер Арлоў, Імёны Свабоды, 4-е выданьне.
У памяці
1553 — Франсуа Рабле, францускі пісьменьнік-гуманіст.
1626 — Фрэнсіс Бэкан, англійскі філёзаф.
1802 — Францішак Станіслаў Гутэн-Чапскі, дзяржаўны дзяяч Рэчы Паспалітай.
1999 — Апалёнія Пяткун, беларуская каталіцкая манашка.
У 1949-м па колішняй Заходняй Беларусі пракацілася хваля арыштаў каталіцкіх сьвятароў. Некаторыя здолелі схавацца ў лясах, на далёкіх хутарах. Іхняй ратавальніцай стала маці Апалёнія, якая ў жабрачым адзеньні штодня праходзіла не адзін дзясятак кілямэтраў, прыносячы ксяндзам ежу і навіны.
Уладзімер Арлоў, Імёны Свабоды, 4-е выданьне.
2012 — Арына Вячорка, беларускі грамадзкі дзеяч, навуковец, пэдагог.
Матэматык паводле адукацыі, яна разам з купкаю сяброў і аднадумцаў стварала першае нацыянальнае незалежнае згуртаваньне новага часу — «Беларускую сьпеўна-драматычную майстроўню», а затым яе спадкаеміцу «Талаку», ладзіла дзясяткі імпрэзаў, адраджала беларускае школьніцтва.
Уладзімер Арлоў, Імёны Свабоды, 4-е выданьне.
2016 — Зьміцер Саўка, беларускі мовазнаўца, адзін з аўтараў нармалізацыі беларускага клясычнага правапісу.
Зьміцер Саўка знайшоў пакліканьне ў філялёгіі, стаўшы ў гэтай сфэры, часам казалі, «акадэмікам бяз званьня». Дзе б ён ні працаваў — выкладчыкам у Лінгвістычным унівэрсытэце, стыльрэдактарам на Радыё Рацыя, на тэлеканале «Белсат» (там з 2006-га Саўка кіраваў моўнаю службай) — паўсюль здольны быў разьвязаць любое найскладанейшае пытаньне, ствараў канон.
Уладзімер Арлоў, Імёны Свабоды, 4-е выданьне.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў