Лінкі ўнівэрсальнага доступу

Праваабаронцы прызналі затрыманых актывістаў нефармальнага Саюзу палякаў Беларусі палітвязьнямі. Цяпер іх 325


Старшыня Саюзу палякаў Анжаліка Борыс

Беларускія праваабаронцы 31 сакавіка прызналі палітвязьнямі затрыманых актывістаў нефармальнага Саюзу палякаў Беларусі — Анжаліку Борыс, Андрэя Пачобута, Марыю Цішкоўскую, Ірэну Бярнацкую і Ганну Панішаву.

«Варта адзначыць, што гэтыя дзеяньні ўладаў адбываюцца на фоне антыпольскай прапаганды на дзяржаўным тэлебачаньні, дзе Польшча зьяўляецца краінай-агрэсарам, якая нібыта мае тэрытарыяльныя прэтэнзіі да Рэспублікі Беларусь», — цытуе БелаПАН супольную заяву праваабарончых арганізацый.

На думку праваабаронцаў, «агрэсіўная антыпольская дзяржаўная прапаганда, вытрыманая ў найгоршых сталінскіх традыцыях, выклікае сур'ёзную заклапочанасьць магчымымі нэгатыўнымі наступствамі для грамадзян Беларусі польскай нацыянальнасьці і відавочна не спрыяе палітыцы добрасуседзтва і даверу паміж гістарычна блізкімі народамі».

Аўтары заявы патрабуюць ад уладаў вызваліць актывістаў абʼяднаньня, спыніць іх крымінальны перасьлед і спыніць ціск на прадстаўнікоў польскай нацыянальнай меншасьці і выкарыстаньне арт. 130 КК для пакараньня за выказваньне меркаваньня аб гістарычных фактах, што несумяшчальна з абавязаньнямі Беларусі ў рамках Міжнароднага пакту аб грамадзянскіх і палітычных правах.

Такім чынам, на 31 сакавіка палітвязьнямі ў краіне прызнаныя 325 чалавек.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG