Лінкі ўнівэрсальнага доступу

Мэркель і Макрон абмеркавалі з Пуціным імпарт вакцыны «Спутнік V»


Прэзыдэнт Францыі Эманюэль Макрон і канцлерка Нямеччыны Ангела Мэркель ў аўторак абмеркавалі з Уладзімірам Пуціным магчымае выкарыстаньне ў сваіх краінах вакцыны «Спутнік V».

Пра гэта паведамляе Politico са спасылкай на заяву ўрадаў гэтых краінаў.

Адпаведную тэму эўрапейскія лідэры абмеркавалі з расейскім прэзыдэнтам на відэаканфэрэнцыі ў аўторак. Цяпер Эўрапейскае агенцтва лекавых сродкаў (EMA) вывучае заяўку Расеі на праверку яе прэпарату. Парыж і Бэрлін выказваюць гатовасьць імпартаваць «Спутнік V» у выпадку станоўчага адказу рэгулятара.

Разам з тым аўстрыйскія ўлады, як выглядае, вырашылі не чакаць агульнаэўрапейскай інстанцыі і маюць намер замовіць партыю расейскай вакцыны ўжо на наступным тыдні.

«Спутнік V» выклікаў спрэчкі сярод эўрапейскіх урадаў. Некалькі краінаў вырашылі закупіць прэпарат без папярэдняй праверкі эўрапейскім агенцтвам, тады як большасьць выказалі недавер і вырашылі дачакацца як мінімум афіцыйнага заключэньня нагляднага органу ЭЗ.

Кіраўніца Эўрапейскай камісіі Ўрсуля фон дэр Ляен у мінулым месяцы заклікала Маскву растлумачыць, чаму тая мае намер экспартаваць мільёны дозаў, тым часам як тэмпы вакцынацыі ўнутры самой Расеі сур’ёзна адстаюць ад адпаведных паказьнікаў у ЭЗ і ЗША.

Цяпер толькі каля 7 працэнтаў расейцаў атрымалі першую дозу, тым часам як у ЭЗ гэты паказьнік дасягае 12 працэнтаў, у Амэрыцы перавысіў 30 працэнтаў, у Брытаніі першай дозай вакцынаваны кожны другі паўналетні, а ў Ізраілі больш за палову насельніцтва атрымалі дзьве дозы.

Разам з тым эўрапейскія прыхільнікі «Спутніка V» усё часьцей спасылаюцца на затрымкі з пастаўкамі нямецкага і брытанскага прэпаратаў. Вугоршчына і Славаччына пачалі атрымліваць дозы расейскіх вакцын, не чакаючы ўхваленьня EMA.

Раней у гэтым месяцы Расейскі фонд прамых інвэстыцый падпісаў пагадненьне аб вытворчасьці дозаў «Спутніка V» у Італіі. Для расейскага боку гэта першая такая ўгода ў Эўропе. Цяпер расейскі «Спутнік V» вырабляецца ў Індыі і ў Паўднёвай Карэі. У самой Расеі вытворчых магутнасьцяў не хапае або і зусім няма.

Шэраг заходніх урадаў, уключаючы ЗША і Літву, абвінавачваюць расейскія ўлады ў тым, што яны выкарыстоўваюць «Спутнік V» як «зброю гібрыднай вайны» з мэтай расколу эўраатлянтычнага адзінства. У Маскве адмаўляюць абвінавачаньні і настойваюць на тым, што місія носіць выключна «гуманітарны» характар.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG