Падзеі 27 сакавіка ў беларускай і сусьветнай гісторыі.
27 сакавіка — Міжнародны дзень тэатру, устаноўлены кангрэсам Міжнароднага інстытуту тэатру 60 гадоў таму.
Дзень у гісторыі
1918 — Рада БНР абвясьціла, што бярэ на сябе ўсю паўнату ўлады ў Беларусі.
1986 — роўна за месяц да чарнобыльскай аварыі газэта «Літаратурная Ўкраіна» надрукавала артыкул пра нізкую якасьць будаўніцтва Чарнобыльскай АЭС. Аўтарам была маладая журналістка з Прыпяці Любоў Кавалеўская.
1999 — адбыўся І зьезд беларусаў Расейскай Фэдэрацыі.
У гэты дзень нарадзіліся
1891 — Клаўдзі Дуж-Душэўскі, беларускі архітэктар, выдавец, журналіст, грамадзкі дзеяч, распрацаваў узор сьцяга БНР.
Усё, як вядома, пазнаецца ў параўнаньні. Калі маю нацыянальна арыентаваную душу наведваюць скруха і паняверка, я змагаюся зь імі, думаючы, да прыкладу, аб тым, што сёньня няма такога беларуса, які б ня ведаў колераў нашага нацыянальнага сьцяга (няхай не для кожнага ён пасьпеў стаць сьвятыняю). А вось у 1970-я пра бел-чырвона-белы сьцяг анічога ня чула абсалютная большасьць студэнтаў нават майго роднага гістарычнага факультэту БДУ. У тым ліку і наш аднакурсьнік Саша Душэўскі, блізкі сваяк чалавека, які на пачатку ХХ стагодзьдзя падараваў, ці, дакладней, вярнуў беларусам Сьцяг.
Уладзімер Арлоў, Імёны Свабоды, 4-е выданьне
1909 — Валеры Маракоў, беларускі паэт і перакладчык.
У 1935-м Маракова за верш «Песьня перамог» выключаюць з Саюзу пісьменьнікаў. Тадысама адбываецца першы арышт — за ўдзел у «контрарэвалюцыйнай нацдэмаўскай арганізацыі». НКВД прыяжджае й па ягонага бацьку Дзьмітрыя, царкоўнага старасту. Самога паэта зноў арыштоўваюць.
Пасьля году катаваньняў яго разам зь яшчэ дваццаць адным літаратарам расстралялі ў менскай турме НКВД. Разгляд кожнай справы займаў роўна пятнаццаць хвілінаў. У прыгарадным лесе, які пазьней стаў паркам Чалюскінцаў, у Лошыцы ці ў Курапатах, зьявілася новая безыменная братняя магіла. Маці да 1939-га насіла ў турму перадачы, і іх — прымалі!
Уладзімер Арлоў, Імёны Свабоды, 4-е выданьне
1924 — Павал Урбан, беларускі гісторык, грамадзкі дзеяч.
1963 — Квэнтын Тарантына, амэрыканскі рэжысэр, сцэнарыст, актор і прадусар.
У памяці
1979 — памёр Рыгор Крушына, беларускі паэт.
Ён стаў першым беларускім пісьменьнікам, прынятым у Міжнародны ПЭН-клюб (1966 г.).
Дзеля гэтага Рыгор Крушына мусіў пакінуць Радзіму, апынуцца на Захадзе, трапіць у лягер для перамешчаных асобаў, вытрымаць безьліч выпрабаваньняў эмігранцкага жыцьця. Вядома, усё тое ён прайшоў зусім ня з мэтаю здабыць пасьведчаньне сябра ПЭНу.
Уладзімер Арлоў, Імёны Свабоды, 4-е выданьне
2006 — памёр Станіслаў Лем, польскі пісьменьнік-фантаст.
