Уначы ўзламалі акаўнты трох супрацоўнікаў рэдакцыі, у тым ліку намесьніка галоўнага рэдактара Зьмітра Панкаўца. Зламысьнікі часова атрымалі доступ да тэлеграм-канала «Нашай нівы», выдалілі ўсе навіны за 25 сакавіка і каля 1300 падпісчыкаў, паведаміла «Наша ніва».
У рэдакцыі дадалі, што такія спробы ўзлому адбываліся другую ноч запар — прыблізна а 3-й ночы работнікі НН атрымліваюць паведамленьні аб спробе ўзлому.
Паводле НН, узломшчыкі маглі бачыць толькі імя акаўнта, падпісанага на тэлеграм-канал выданьня. Аднак магчыма, што зламысьнікі завалодалі ўсімі перапіскамі Зьмітра Панкаўца.
Спрабавалі ўзламаць ня толькі тэлеграм-акаўнты штатных работнікаў «Нашай нівы», але і пазаштатных супрацоўнікаў. Некалькі месяцаў таму Сьледчы камітэт настойліва запытваў кантактныя дадзеныя кожнага зь іх, адзначыла рэдакцыя.
Цяпер рэдакцыя аднавіла кантроль над узламанымі каналамі.
Спрабавалі ўзламаць і тэлеграм адваката Дзьмітрыя Лаеўскага
Уначы з 24 на 25 сакавіка спрабавалі ўзламаць тэлеграм-акаўнт знанага адваката Віктара Бабарыкі Дзьмітрыя Лаеўскага.
«Гэта ўжо другі раз. Першы ўзлом адбыўся ў дзень, калі Маша Калесьнікава прапала (7 верасьня 2020)», — напісаў Лаеўскі.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў