Лінкі ўнівэрсальнага доступу

ЗША заклікалі ўжо сёлета правесьці прэзыдэнцкія выбары ў Беларусі пад міжнародным назіраньнем


Дзяржаўны дэпартамэнт ЗША

Злучаныя Штаты заклікалі беларускія ўлады пачаць дыялёг з уласным народам для вырашэньня крызісу ў краіне. Пра гэта ў адмысловым відэазвароце заявіла намесьніца прэс-сакратара Дзяржаўнага дэпартамэнту Джаліна Портер.

«Сёньня, калі беларусы сьвяткуюць Дзень Волі, адзначаючы ўпершыню абвешчаныя незалежнасьць і сувэрэнітэт Беларусі больш за 100 гадоў таму. Мы пацьвярджаем нашу падтрымку беларусаў у імкненьні да дэмакратычнай будучыні. Па-ранейшаму ўражаныя выключнай сілай, стойкасьцю і мужнасьцю беларускага народу», — адзначыла прадстаўніца Дзярждэпартамэнту.

У сваёй прамове яна адзначыла: нягледзячы на маштабныя рэпрэсіі, беларусы працягваюць выказвацца шляхам мірнага пратэсту, патрабуючы вызваліць палітзьняволеных, дазволіць вярнуцца тым, хто цяпер у выгнаньні, а таксама заклікаюць рэжым да рэальнага дыялёгу, які ўжо сёлета прывёў бы да новых выбараў пад незалежным міжнародным назіраньнем.

Зьвяртаючыся да беларускіх уладаў, Джаліна Портер падкрэсьліла: яшчэ ня позна пачаць паважаць правы тых, кім яны кіруюць. І заклікала адгукнуцца на патрабаваньне людзей аб адкрытым дыялёгу.

Яна працытавала выказваньне Нобэлеўскай ляўрэаткі Сьвятланы Алексіевіч пра тое, што «Свабода — гэта ня хуткае сьвята, а доўгая дарога», і запэўніла, што гэтым шляхам Амэрыка будзе заўсёды крочыць поруч зь Беларусьсю.

«За вашу і нашу свабоду!», — завершыла свой зварот намесьніца прэс-сакратара Дзяржаўнага дэпартамэнту ЗША.

18 сакавіка Сьвятлана Ціханоўская абвясьціла пачатак агульнанацыянальнага галасаваньня на плятформе «Голас» за арганізацыю перамоваў з прадстаўнікамі ўладаў Беларусі пры міжнародным пасярэдніцтве.

За прамінулы тыдзень колькасьць тых, хто падтрымаў ініцыятыву, склала 750 тысяч чалавек.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG