Лінкі ўнівэрсальнага доступу

Журналіста Зьмітра Казакевіча аштрафавалі на 1740 рублёў. Ён працытаваў у судзе Оруэла


Зьміцер Казакевіч, фота БАЖ

Суд Першамайскага раёну Віцебску пакараў незалежнага журналіста Зьмітра Казакевіча двума максымальнымі штрафамі за супрацу зь «Белсатам» без акрэдытацыі беларускага Міністэрства замежных спраў, паведаміла БАЖ.

Судзьдзі Андрэй Шыдлоўскі і Вераніка Барысава прызналі журналіста вінаватым у незаконным вырабе прадукцыі СМІ. У прыватнасьці, дзьвюх публікацый, якія ў лютым выйшлі на сайце belsat.eu. Паводле пратаколаў, аўтар напісаў матэрыялы, «злоўжываючы правамі і парушаючы абавязкі журналіста».

Зьміцер Казакевіч расказаў, што адзін з артыкулаў — гэта гісторыя пра звальненьне выкладчыка мэдычнага ўнівэрсытэту, які адбыў трое сутак пад арыштам за белыя і чырвоныя фіранкі ў сваёй кватэры. Другі — пра судовы працэс над жыхаром Віцебску за супраціў міліцыянтам. Зьвесткі пра гэтыя артыкулы знайшлі падчас агляду ноўтбука журналіста, забранага падчас ператрусу.

Зьміцер Казакевіч адмовіўся даваць суду тлумачэньні ў справах. Кажа, што зрабіў гэта на знак салідарнасьці з калегамі:

«Мне нават няёмка сябе бараніць, калі мае каляжанкі Дар’я Чульцова і Кацярына Андрэева сядзяць у турме, калі іншых журналістаў трымаюць за кратамі, калі ў краіне амаль 300 палітзьняволеных. Я адмовіўся даваць паказаньні на знак салідарнасьці і павагі да іх».

Журналіст абмежаваўся кароткім зваротам да суду, дзе падкрэсьліў, што ня лічыць сябе вінаватым. І працытаваў урывак з рамана-антыўтопіі Джорджа Оруэла «1984» пра тое, што толькі тады жыцьцё ў краіне можна лічыць нармальным, калі двойчы два — гэта чатыры, і ніхто не імкнецца давесьці, што гэта ня так.

Гэтую кнігу — пераклад рамана з ангельскай на беларускую Сяргея Шупы — Зьміцер спрабаваў падарыць судзьдзю Андрэю Шыдлоўскаму. Але той адмовіўся, патлумачыўшы, што судзьдзям гэта забаронена, і што ён увогуле не чытае па-беларуску.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG