Жыхарка Наваградку, якая пажадала застацца ананімнай (ейныя дадзеныя ёсьць у рэдакцыі), расказала, што ёй і яшчэ некалькім людзям у горадзе прыйшлі «лісты шчасьця» з падатковай інспэкцыі. Цягам 10 дзён ім трэба падаць дэклярацыю аб даходах і маёмасьці з пачатку 2020 году да 28 лютага 2021 году.
«Паводле зьвестак, якія ёсьць у падатковым органе, папярэдняя сума, якая перавышае кошт маёмасьці, што вам належыць, і перавышае расходы над даходамі, складае ... беларускіх рублёў», — гаворыцца ў дакумэнце, на месцы неабходнай сумы стаіць прочырк.
Калі нехта ня можа ў патрэбны тэрмін падаць дэклярацыю, трэба паведаміць пра гэта ў падатковую і патлумачыць прычыну, а таксама назваць тэрмін, калі гэта будзе магчымым.
Чаму менавіта ім прыйшоў запыт з падатковай, жыхарка Наваградку ня ведае, але дапускае, што гэта можа быць зьвязана з удзелам у вулічных акцыях пасьля прэзыдэнцкіх выбараў 2020 году.
Раней у сакавіку ўжо паведамлялася, што Сьледчы камітэт і Дэпартамэнт фінансавых расьсьледаваньняў выклікаюць у якасьці сьведак беларусаў, якім дапамагаў фонд.
У лістападзе 2020 году ў беларусаў, якія атрымлівалі грашовую дапамогу ад фонду BY_help на лячэньне і аплату штрафаў, заблякавалі банкаўскія карткі, на якія прыходзілі выплаты. У Сьледчым камітэце блякаваньне патлумачылі расьсьледаваньнем крымінальнай справы аб «публічных закліках да дзеяньняў, накіраваных на прычыненьне шкоды нацыянальнай бясьпецы».
Паводле СК, адзін з заснавальнікаў BY_help Аляксей Лявончык, прызнаны падазраваным, пералічваў са свайго рахунку «грашовыя сродкі для падтрымкі пратэставых акцый у Беларусі і аказаньня матэрыяльнай дапамогі асобам, якія бяруць у іх актыўны ўдзел». На гэтыя грошы наклалі арышт. У выніку на рахунках у шматлікіх атрымальнікаў дапамогі ўтварыліся запазычанасьці, некаторыя не маглі атрымаць пэнсіі, дапамогі і зарплаты.
Пазьней у сытуацыю ўмяшаўся Нацбанк і ўзгадніў мэханізм накладаньня арышту. У ім прапісана, што на грошы, якія паступілі зь іншых крыніц, накласьці арышт нельга. Пасьля гэтага людзям вярнуліся грошы, сьпісаныя за кошт заробкаў або ашчаджэньняў.
