Лінкі ўнівэрсальнага доступу

Узбэкістан і Кіргізстан пачнуць перамовы пра канчатковую дэлімітацыю дзяржаўнай мяжы


Прэзыдэнт Кіргізстану Садыр Жапараў і прэзыдэнт Узбэкістану Шаўкат Мірзіёёў на перамовах 11 сакавіка 2021 году, Ташкент

Пытаньне плянуюць вырашыць за тры месяцы. Няўзгодненымі застаюцца 15% мяжы.

Пра намер канчаткова разабрацца з усімі спрэчнымі ўчасткамі мяжы дзьвюх дзяржаў заявіў прэзыдэнт Узбэкістану Шаўкат Мірзіёёў пасьля перамоваў з прэзыдэнтам Кіргізстану Садырам Жапаравым, паведаміла «Радио Озоди».

Неўзабаве, па словах Мірзіёёва, пачнуцца «практычныя крокі» па найхутчэйшым завяршэньні прававога афармленьня ўзбэкска-кіргіскай дзяржаўнай мяжы. Гэта дазволіць таксама забясьпечыць паўнавартасную працу памежных пунктаў пропуску.

З 1378 кілямэтраў мяжы паміж Кіргізстанам і Ўзбэкістанам 85% (1170 км) вызначылі да 2017 году, яшчэ 10% узгаднілі пазьней, аднак іх яшчэ не ратыфікавалі ўрады і парлямэнты. Бягучыя перамовы канчаткова вырашаць тэрытарыяльную прыналежнасьць няўзгодненых участкаў.

На тэрыторыі Кіргізстану разьмешчаны чатыры эксклявы Ўзбэкістану: Сох, Чангара-Калча, Шахімардон, Таштэпа, а на тэрыторыі Ўзбэкістану — экскляў Кіргізстану Барак.

У лютым кіраўнік Дзяржаўнага камітэта нацыянальнай бясьпекі Кіргізстану Камчыбек Ташыеў заявіў пра дамоўленасьць абедзьвюх дзяржаў абмяняцца зямельнымі ўчасткамі ў некаторых раёнах паблізу мяжы.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG