Суд Рэчыцкага раёну разгледзеў на закрытым судовым пасяджэньні крымінальную справу аб абразе Аляксандра Лукашэнкі і прадстаўніка ўлады.
Пра вырак паведаміла дзяржаўнае агенцтва БелТА са спасылкай на Гомельскі абласны суд.
Фігуранту справы прад'явілі абвінавачваньне паводле ч.1 арт. 368, арт. 369 Крымінальнага кодэксу. Выракам Рэчыцкага суду абвінавачаны быў прызнаны вінаватым у публічнай абразе Аляксандра Лукашэнкі і пакараны за гэта адным годам пазбаўленьня волі. Таксама суд прызнаў яго вінаватым у публічнай абразе прадстаўніка ўлады ў сувязі з выкананьнем ім службовых абавязкаў. На падставе арт. 369 КК яму прызначана пакараньне ў выглядзе арышту на 3 месяцы.
Канчаткова суд прызначыў яму пакараньне ў выглядзе пазбаўленьня волі на 1 год 2 месяцы з адбываньнем тэрміну ў папраўчай калёніі агульнага рэжыму.
На гэтым тыдні справы аб абразе Лукашэнкі праходзяць і ў іншых гарадах Беларусі. У прыватнасьці ў судзе Барысаўскага раёна сёньня таксама чакаецца вырак за абразу Лукашэнкі ў сацсетцы. Суд Менскага раёну 11 сакавіка пачынае разглядаць справу аб абразе Лукашэнкі, 12 сакавіка суд Заводзкага раёну Менска пачне разгляд яшчэ адной справы аб абразе Лукашэнкі.