Паводле «Палескай Вясны», у Мазыры і Сьветлагорску спасылаюцца на забраныя падчас ператрусаў на кватэрах і ў офісах рэгіянальных філіяў копіямі абскарджваньня прысудаў паводле артыкулу 23.34. Гэтыя дакумэнты зьяўляюцца падставай для выкліку на допыты.
Сьледчыя задаюць пытаньні пра тое, хто аплачваў штрафы і пошліны. Так, у Мазыры сьледчыя наўпрост задаюць пытаньні пра тое, што зьвязвае выкліканых з кіраўніком Мазырскай філіі «Вясны» Уладзімерам Целепуном.
У Сьветлагорску цікавяцца адносна кіраўніцы мясцовага прадстаўніцтва Алены Масьлюковай.
Акрамя таго, усіх прымушаюць даваць падпіску аб неразгалошваньні, каб зрабіць «расьсьледаваньне» максымальна закрытым.
Вядома найменей пра шэсьць чалавек, якіх выклікалі на допыты ў справе «Вясны» у Мазыры, і пра 10 чалавек у Сьветлагорску.
5 сакавіка Рада праваабарончага цэнтру «Вясна» прыняла заяву наконт крымінальнай справы ў дачыненьні да арганізацыі паводле артыкулу 342 Крымінальнага кодэксу (арганізацыя і актыўны ўдзел у групавых дзеяньнях, якія груба парушаюць грамадзкі парадак).
Юрыст Гомельскай філіі «Вясны» Леанід Судаленка ўжо зьняволены і абвінавачаны паводле гэтай справы. Таксама ў зьняволенні знаходзяцца кіраўніца валянтэрскай службы Марфа Рабкова, валянтэры Тацяна Ласіца і Андрэй Чапюк.
