Тады суседзі сабраліся на традыцыйнае чаяваньне. У нейкі момант з аркі дому да іх выйшлі 15 чалавек у цёмнай вопратцы. Яны атачылі суседзяў і паведамілі ім, што паступаюць скаргі на такія сходы.
Усіх удзельнікаў чаяваньня адвялі ў аўтобус для ўстанаўленьня іх асобы. У РУУС Цэнтральнага раёну адвезьлі 9 чалавек, дзе на іх склалі пратаколы па арт. 23.34 КаАП, а на некаторых і па арт. 23.4 КаАП. Семярых адпусьцілі да суду дадому, а дваіх адправілі ў турму на Акрэсьціна.
У турму тады трапілі Ганна Цуба і журналістка «Белсату» Кацярына Ткачэнка. У РУУС на іх дваіх склалі адразу два пратаколы, але на Акрэсьціна журналістцы стала дрэнна і яе адвезьлі на хуткай.
Як паведамляе Праваабарончы цэнтар «Вясна», 5 лютага судзьдзя Дзьмітрый Карсюк прызнаў Ганну Цубу вінаватай у непадпарадкаваньні і чаяваньні, палічыўшы гэта масавым мерапрыемствам. 26-гадовая дзяўчына ўжо адседзела 15 дзён арышту.
2 сакавіка судзілі журналістку Кацярыну Ткачэнку. Судзьдзя Карсюк аштрафаваў яе паводле двух пратаколаў на 50 базавых велічыняў (1450 рублёў).
Па рашэньні судзьдзі Карсюка Ганна Палоньнікава і Марына Кашына былі аштрафаваныя на 725 рублёў (25 базавых), а Віялета Клюева атрымала штраф 870 рублёў (30 базавых).
Аляксандру Стрыжанаву і Ірыну Брошчан судзьдзя Вікторыя Шабуня пакарала штрафам 725 рублёў (25 базавых).
Суды яшчэ над двума ўдзельнікамі чаяваньня чакаюцца 9 сакавіка.