«Гэта абавязкова трэба вынесьці на дыскусію паміж дэмакратычнымі сіламі і прадстаўнікамі рэжыму. Зразумела, пытаньне можна абмяркоўваць, але што тычыцца некаторых фізычных гарантый бясьпекі Лукашэнку і ягонай сям’і, яны могуць быць дадзеныя, калі гэта неабходна для яго»,— сказала Сьвятлана Ціханоўская ў інтэрвію ўкраінскаму выданьню «НВ».
«Шмат хто гаворыць пра суд. Магчыма, гэта будзе, паступова. Ёсьць шмат сцэнароў. Можа, ён куды-небудзь сам паедзе; магчыма, неяк інакш складзецца. Але чыста па-чалавечы я ўяўляю ягонае жыцьцё вельмі самотным, з штодзённым разуменьнем таго, што ён мог бы быць першым прэзыдэнтам Беларусі, і людзі, магчыма, шмат добрага пра яго ўспаміналі б. Але ў канцы сваёй кар’еры ён зрабіў недапушчальныя для прэзыдэнта злачынствы. І добрым словам яго наўрад ці згадаюць».
Сьвятлана Ціханоўская мяркуе, што большасьць беларусаў таксама пагодзіцца на гарантыі бясьпекі для Лукашэнкі, калі гэта дапаможа спыніць рэпрэсіі.
«Я лічу, што большасьць беларусаў прытрымліваюцца такой жа думкі: калі гэта дапаможа проста цяпер спыніць тэрор і рэпрэсіі, то гарантыі асабістай бясьпекі можна даць. І кожны беларус на гэта пайшоў бы. Але гарантыі бясьпекі не азначаюць прабачэньня», — падкрэсьліла яна.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў