Лінкі ўнівэрсальнага доступу

Ужо сёньня: 30 гадоў таму скончылася вайна ў Пэрсыдзкай затоцы


Амэрыканскі джып і саудаўскі танк у Кувэйце, 26 лютага 1991 году

Падзеі 27 лютага ў беларускай і сусьветнай гісторыі.

Дата дня

27 лютага 1991 году прэзыдэнт ЗША Джордж Буш-старэйшы абвясьціў пра заканчэньне вайны ў Пэрсыдзкай затоцы паміж кааліцыяй на чале з ЗША і Іракам за вызваленьне і аднаўленьне незалежнасьці Кувэйту.

Таксама ў гэты дзень

1612 — пачала працу друкарня ў Любчы пад Наваградкам. Усяго яна выпусьціла больш за 80 кніжак па-лацінску і па-польску.

1919 — была ўтвораная Літоўска-Беларуская ССР.

1933 — адбыўся пажар бэрлінскага Райхстагу.

2015 — у Маскве быў забіты расейскі апазыцыйны палітык Барыс Нямцоў.

У гэты дзень нарадзіліся

1734 — Караль Станіслаў Радзівіл «Пане Каханку», дзяржаўны дзяяч Вялікага Княства Літоўскага.

1888 — Яўхім Бялевіч, дзяяч нацыянальнага руху, міністар юстыцыі і фінансаў у Народным сакратарыяце — першым урадзе БНР.

1902 — Джон Стэйнбэк, амэрыканскі пісьменьнік, ляўрэат Нобэлеўскае прэміі 1962 году.

1903 — Міхась Явар, беларускі паэт.

1906 — Рыта Млодак, беларуская опэрная сьпявачка, народная артыстка Беларусі.

1912 — ангельскі празаік Лорэнс Дарэл.

1935 — Фёдар Клімчук, беларускі мовазнаўца-дыялектоляг, гісторык.

У памяці

1936 — памёр расейскі фізіёляг Іван Паўлаў.

1939 — у Менску быў расстраляны Васіль Шчарбакоў, беларускі гісторык.

1982 — нарадзіўся Міхал Шарамет, удзельнік Маладога Фронту БНФ, стваральнік вайскова-патрыятычнай арганізацыі «Ваяр». Памёр нечакана 21 красавіка 2013 г.

Міхал займаўся прамысловым альпінізмам, гэта значыць, выконваў заданьні на вышыні.

Пэўны час ён працаваў у Міністэрстве надзвычайных сытуацыяў. Ня раз выносіў людзей з полымя, але не любіў гаварыць пра гэта.

Калегі-ратавальнікі не здагадваліся, што побач зь імі выяжджае на выклікі адзін зь легендарных няўлоўных Міронаў, якія адважна ўздымалі нашы нацыянальныя сьцягі ў самых нібыта недаступных месцах.

Выратаваўшы многіх іншых, Шарамет ня змог уратавацца сам…

Ён быў зь сябрамі ў паходзе на байдарках. Прыхільнік мэтадаў экстрэмальнага выжываньня, Міхал, паводле завядзёнкі, шукаў ядомыя расьліны. У ручаіне ўбачыў некалькі каранёў, якія чамусьці здаліся яму вадзяным тапінамбурам.

Праз гадзіну яго беларускае сэрца спынілася.

Уладзімер Арлоў, Імёны Свабоды, 4-е выданьне, с. 641.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG