Лінкі ўнівэрсальнага доступу

Міністэрствы замежных спраў і культуры Ўкраіны асудзілі рэпрэсіі супраць журналістаў у Беларусі


Журналісткі Кацярына Андрэева і Дар'я Чульцова ў судзе 18 лютага.

Міністар замежных спраў Украіны Дзьмітрый Кулеба і міністар культуры і інфармацыйнай палітыкі Аляксандр Ткачэнка асудзілі перасьлед журналістаў у Беларусі.

Сумесная іх заява была апублікаваная 21 лютага.

«Увесь дэмакратычны сьвет прызнае СМІ чацьвёртай уладай і не ўмешваецца ў іх прафэсійную дзейнасьць. Напад на свабоду слова, жыцьцё і здароўе журналістаў у Рэспубліцы Беларусь адкрыта парушае гэтыя асноўныя прынцыпы», — гаворыцца ў заяве.

Па словах міністраў, Украіна далучаецца да міжнароднай супольнасьці ў асуджэньні дзеяньняў беларускіх уладаў супраць СМІ. Яны зьвярнулі асаблівую ўвагу на дзеяньні Масквы.

«Асаблівую занепакоенасьць выклікае разбуральная дзейнасьць Расеі, якая з выкарыстаньнем сваёй арміі прапагандыстаў цалкам узурпавала інфармацыйную прастору Беларусі, пазбавіўшы беларусаў права на свабодны доступ да розных крыніц інфармацыі», — заявілі яны.

18 лютага суд Менска асудзіў Кацярыну Андрэеву (Бахвалаву) і Дар’ю Чульцову на два гады ў калёніі за стрым з акцыі пратэсту 15 лістапада. Паводле вэрсіі сьледзтва, журналісты нібыта арганізавалі акцыю пратэсту. Праваабаронцы прызналі Чульцова і Андрэеву палітвязьнямі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG