Двое жыхароў вёскі Каралішчавічы, што каля Менску, апаганілі сямейнае пахаваньне роду Доўнар-Запольскіх 1919 году, піша Tut.by. Частку агароджы з могілак яны паспрабавалі здаць на мэталалом.
Партал спасылаецца на мясцовага жыхара Аляксандра, які перашкодзіў мужчынам рэалізаваць іхны плян. Ён заблякаваў іх у пункце прыёму мэталалому і выклікаў міліцыю. Пазьней пайшоў на могілкі, каб сфатаграфаваць пахаваньне, і знайшоў скрадзены ў яго лом, якім мужчыны зьнішчалі агароджу.
На думку Аляксандра, магчыма, зьніклі агароджы і зь іншых магіл. Але ўсё запарушана сьнегам, таму відаць пакуль ня ўсе. Суразмоўца Tut.by перажывае, што калі пацярпелых у гэтай гісторыі ня будзе, то зламысьнікаў могуць выпусьціць без наступстваў.
