Інстытут Гувэра паведаміў, што Шульц памёр 6 лютага. Установа называе яго «адным з найбольш пасьлядоўных палітыкаў усіх часоў».
Джордж Шульц лічыцца адным з асноўных архітэктараў паляпшэньня амэрыканска-савецкіх дачыненьняў у эпоху прэзыдэнта Рональда Рэйгана і завяршэньня «халоднай вайны».
Пры прэзыдэнту Рычарду Ніксану Шульц быў міністрам фінансаў, міністрам працы і дырэктарам кіраваньня бюджэтам ЗША. У 1982–1989 гадах ён працаваў дзяржаўным сакратаром. Тады прэзыдэнтам быў Рональд Рэйган.
Першыя гады працы Шульца на пасадзе кіраўніка Дзяржаўнага дэпартамэнту былі адзначаныя напружанасьцю з Савецкім Саюзам у сувязі з савецкім газаправодам у Эўропу, разьмяшчэньнем у Эўропе амэрыканскіх ядзерных ракет сярэдняй далёкасьці і зьбіцьцём пасажырскага самалёта Korean Air Lines у 1983 годзе.
Пасьля прыходу да ўлады ў Савецкім Саюзе Міхаіла Гарбачова Шульц заклікаў Рэйгана разьвіваць асабістыя адносіны з кіраўніком СССР. У 1987 годзе два лідэры падпісалі Дамову аб ліквідацыі ракет сярэдняй і малой далёкасьці, адзінае пагадненьне часу «халоднай вайны» аб ліквідацыі цэлай клясы ракет.
Шульц таксама шмат працаваў над урэгуляваньнем палестына-ізраільскага канфлікту і спыненьнем жорсткай грамадзянскай вайны ў Лібане ў 1980-х.
Пасля адыходу ад палітыкі Шульц быў старшым супрацоўнікам Інстытуту Гувэра пры Стэнфардзкім унівэрсытэце. Ён працаваў прыватным дарадцам многіх рэспубліканскіх палітыкаў.
Калі Джордж Буш-малодшы балятаваўся ў прэзыдэнты ў 2000 годзе, Шульц пазнаёміў яго з Кандалізай Райз. Пазьней яна стала дарадцам і дзяржаўным сакратаром Буша.