У Баранавічах на два гады пазбаўленьня волі ў калёніі агульнага рэжыму асудзілі трэнэра-выкладчыка плаваньня Аляксея Павядайлу, паведаміла «Вясна».
Паводле абвінавачваньня, Аляксей Павядайла вырабіў, захоўваў і перавозіў у аўтамабілі гаручае рэчыва, зь якім яго затрымалі 11 жніўня ў Баранавічах. Экспэртыза вызначыла, што склад рэчыва быў блізкі да складу «кактэйлю Молатава».
Павядайла сказаў, што не вырабляў гэтага рэчыва. А захоўваў яго для побытавых патрэбаў і выкарыстоўваць у якасьці «кактэйлю Молатава» не зьбіраўся.
У апошнім слове ён прасіў не пазбаўляць яго волі.
«Я годны грамадзянін Беларусі. У мяне дзьве вышэйшыя адукацыі, у мяне каля 100 вучняў, якія за мяне перажываюць. Добрая характарыстыка з войска (снайпэр-выведнік) — я атрымаў званьне лейтэнанта запасу, і камандзіры прасілі застацца на кантракце. Я люблю сямʼю, люблю сваіх дзяцей, і калі суд угледзіць маю віну, то прашу не пазбаўляць волі».
