Вайскоўцы захапілі ўладу ў Бірме 1 лютага, затрымаўшы ляўрэата Нобэлеўскай прэміі, якая займала пасаду дзяржаўнай дарадцы (фактычна прэмʼер-міністра) Аўн Сан Су Чы і перапыніўшы пераход краіны да дэмакратыі. Дзеяньні войска асудзілі Злучаныя Штаты і іншыя заходнія краіны.
У абвінавачаньнях паліцыі, якія былі выкладзеныя ў судзе, 75-гадовую Су Чы абвінавачваюць у тым, што ў яе доме пры ператрусе знайшлі рацыі, якія нібыта былі ўвезеныя незаконна і выкарыстоўваліся без дазволу.
У асобным дакумэнце гаворыцца, што паліцыя высунула абвінавачванае зрынутаму прэзыдэнту Віну М'іну за нібыта парушэньне ім Закону аб ліквідацыі наступстваў стыхійных бедзтваў.
1 лютага стала вядома, што вайскоўцы Мʼянмы зьдзейсьнілі пераварот, затрымаўшы фактычную лідэрку краіны Аўн Сан Су Чы і прэзыдэнта Він М'іна.
Адносіны паміж цывільнай уладай і войскам пагоршыліся пасьля выбараў у лістападзе, якія вайскоўцы абвясьцілі сфальсыфікаванымі, таму што на іх пацярпела істотную паразу іхная Партыя яднаньня і разьвіцьця Саюзу (афіцыйная назва дзяржавы — Рэспубліка Саюз Мʼянма). Перамагла Нацыянальная ліга за дэмакратыю. Парлямэнт павінен быў пачаць пасяджэньні 1 лютага.
Вайскоўцы Мʼянмы, якія кіравалі гэтай дзяржавай Паўднёва-Ўсходняй Азіі на працягу 50 гадоў, захоўвалі значны палітычны і эканамічны ўплыў і пасьля прыходу да ўлады Су Чы на выбарах 2015 году. Перад гэтым палітык правяла агульным лікам некалькі дзесяцігодзьдзяў пад хатнім арыштам.
