Справу разглядала судзьдзя Алена Жывіца, паведамляе Праваабарончы цэнтар «Вясна».
Палітвязьня абвінавацілі ў тым, што 10 жніўня ў Менску ён з групай асобаў «наўмысна перашкаджаў руху грамадзкага транспарту, загадзя гэта сплянаваўшы».
Таксама была агучаная шкода, прычыненая «масавымі беспарадкамі», пачынаючы ад 9 жніўня і да 4 кастрычніка. Згодна з даведкай прадпрыемства «Менсктранс», яна склала 414 тысяч 538 рублёў. Страты ад прыпыненьня транспарту — 404 тысячы 542 рублі.
Сьведкі абвінавачваньня на паседжаньне не зьявіліся. У іх адсутнасьць заслухалі сьведчаньні кіроўцы тралейбуса. Той расказаў, што 10 жніўня працаваў на маршруце № 13, калі пачаліся праблемы з рухам транспарту. У 23.55 ён убачыў на вуліцы Прытыцкага, як мужчыны кацілі камень на дарогу. Сярод іх апазнаў Каленчыца.
Абвінаваўца адзначыў, што віна падсуднага паводле ч.1 арт.342 пацьвярджаецца пратаколам, фатаздымкамі і актамі «Менсктрансу». І папрасіў для абвінавачанага абмежаваньне волі тэрмінам 3 гады — так званую «хімію».
Валеры Каленчыц працуе сантэхнікам, паводле адукацыі зваршчык. Быў затрыманы летась 16 кастрычніка ў сябе дома.
