Лінкі ўнівэрсальнага доступу

Да ўладальніка крамы з нацыянальнай сымболікай у Баранавічах прыйшла праверка ДФР


Да ўладальніка крамы з нацыянальнай сымболікай «Росквіт» у Баранавічах, берасьцейскага абласнога каардынатара руху «За свабоду» Юрыя Казакевіча прыйшлі супрацоўнікі Дэпартаменту фінансавых расьсьледаваньняў Камітэту дзяржаўнага кантролю — правяраць інфармацыю аб нявыплаце падаткаў.

«У краму прыйшла пазачарговая праверка з ДФР у сувязі з тым, што ў іх было нейкае паведамленьне, быццам я ўхіляўся ад выплаты падаткаў у буйным памеры», — паведаміў Казакевіч агенцтву БелаПАН.

Паводле яго, прайшлі тры ператрусы: у краме, машыне і дома. У кватэры забралі кампутар і тэлефон.

«Ператрус у кватэры доўжыўся каля дзьвюх гадзін. Цікавіліся паперамі. У мяне з 2009 году архіў ІП, накладныя і дэклярацыі. Затым папрасілі ўключыць стацыянарны кампутар, адключылі яго ад інтэрнэту і сказалі: „Будзем канфіскоўваць“. І тое самае пра тэлефон», — кажа актывіст.

Ва ўсіх выпадках супрацоўнікі ДФР паказалі свае пасьведчаньні, дэманстравалі санкцыі пракурора, аднак урэшце не пакінулі ніякіх папер, параіўшы зьвязвацца са сьледчым, сказаў Казакевіч.

Паводле прадпрымальніка, ён мусіць да 26 студзеня прадставіць усе дакумэнты на краму. Пры гэтым «Росквіт» можа працягваць працу — там нічога не забрана.

«Лічу, што ў тым, што адбываецца, ёсьць палітычная падаплёка. Але і эканамічная таксама, бо ўлады любым спосабам выціскаюць грошы з прадпрымальнікаў і яшчэ больш зацікаўленыя ў гэтым, калі чалавек яшчэ і актывіст», — заявіў Казакевіч.

Ён падкрэсьліў, што ўсе падаткі ў яго выплачаныя своечасова і ў поўным аб’ёме.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG