Лінкі ўнівэрсальнага доступу

«Напружаная сытуацыя ў камэрах». Палітвязьня Мікалая Дзядка наведала адвакатка


Мікалай Дзядок. Архіўнае фота

Палітвязьня Мікалая Дзядка ў СІЗА на Валадарскага наведала адвакатка. Бацька вязьня Аляксандар Дзядок кажа, што цяпер валодае зьвесткамі пра сына, якія яго ў пэўнай ступені супакоілі, але засталіся і прычыны, каб турбавацца.

«Адваката доўга не дапускалі, між тым у канцы году зь вязьніцы мы атрымалі зьвесткі, што жыцьцю і здароўю Мікалая ўзьнікла пагроза. Тая інфармацыя, што мы цяпер атрымалі, крыху супакоіла: сын жывы, здаровы, перанёс прастуду, на каранавірус не захварэў. Застаецца ў той жа камэры № 14, якую ізалявалі былі на карантын, але цяпер карантын зьняты. Але канфлікты з сукамэрнікамі засталіся, і, мяркую, напружаная сытуацыя ў камэрах, дзе ён пабываў, пакуль сядзіць на „Валадарцы“, рэч не выпадковая», — мяркуе былы судзьдзя Аляксандар Дзядок.

Паводле Дзядка-старэйшага, у беларускіх турмах нічога не адбываецца без кантролю з боку адміністрацыі і апэратыўных супрацоўнікаў.

Аляксандар Дзядок мяркуе, што пасьля затрыманьня ягонага сына зьбівалі і ўжывалі адносна яго сьлезацечны газ, каб атрымаць патрэбныя сьледзтву зьвесткі. Бацька вязьня спасылаецца на відэа, на якім убачыў на твары сына сьляды зьбіцьця, а таксама на зьвесткі пра газ, якія ён атрымаў зь іншых крыніц.

«Яго хацелі падавіць маральна, каб больш ня быў ім небясьпечны, не паведамляў пра іх праўду. Але ён нічога не рабіў супрацьзаконнага, у сваім блогу ён казаў тое, што ёсьць, у тым ліку пра дзеяньні пэўных сілавых структур», — мяркуе Аляксандар Дзядок.

Паводле Аляксандра Дзядка, ягоны сын за апошнія дні атрымаў больш за 100 лістоў, у якіх людзі выказваюць яму падтрымку, і ён за гэта ўсім вельмі ўдзячны.

«Ведаю, гэта вельмі моцна яго падтрымлівае», — сказаў Дзядок-старэйшы.

Актывіст анархісцкага руху Мікалай Дзядок быў затрыманы 12 лістапада ў пасёлку Сасновы Асіповіцкага раёну Магілёўскай вобласьці, дзе ён пражываў на найманай кватэры і вёў блог «Міkоlа», які меў 15 тысяч падпісчыкаў. Мікалая Дзядка абвінавацілі паводле 342 артыкула Крымінальнага кодэксу ў арганізацыі і падрыхтоўцы дзеяньняў, якія груба парушаюць грамадзкі парадак. Актывіст сваёй віны не прызнае. Праваабаронцы прызналі Мікалая Дзядка палітвязьнем.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG