Лінкі ўнівэрсальнага доступу

Папа Францішак прыняў адстаўку кіраўніка Каталіцкай царквы Беларусі Кандрусевіча, якога 4 месяцы ўлады не пускалі на радзіму


Арцыбіскуп Тадэвуш Кандрусевіч правёў першую імшу ў архікатэдральным касьцёле Найсвяцейшага імя Марыі ў Менску пасьля вяртаньня ў Беларусь, 24 сьнежня 2020.
Арцыбіскуп Тадэвуш Кандрусевіч правёў першую імшу ў архікатэдральным касьцёле Найсвяцейшага імя Марыі ў Менску пасьля вяртаньня ў Беларусь, 24 сьнежня 2020.

Арцыбіскуп Тадэвуш Кандрусевіч сыходзіць на пэнсію. Часова на ягонае месца прызначаны біскуп Казімер Велікаселец, якому таксама ўжо споўнілася 75 гадоў.

3 студзеня 2021 году, у дзень, калі Мітрапаліту Менска-Магілёўскаму споўнілася 75 гадоў, Францішак прыняў яго адстаўку і прызначыў адміністратара архідыяцэзіі, паведамляе www.vaticannews.

У афіцыйнай заяве Сьвятога Пасаду гаворыцца:

«Сьвяты Айцец прыняў адмову ад пастырскага кіраўніцтва, прадстаўленую Яго Эксцэленцыяй арцыбіскупам Тадэвушам Кандрусевічам, Мітрапалітам Менска-Магілёўскім, у адпаведнасьці з канонам 401 §1 Кодэксу кананічнага права, і адначасова прызначыў Апостальскім Адміністратарам sede vacante на згаданую мітрапаліцкую катэдру біскупа Казімера Велікасельца O.P., тытулярнага біскупа Бланды і дапаможнага біскупа Пінскай дыяцэзіі».

Біскуп Казімер Велікаселец сказаў Свабодзе, што пакуль не мае часу на камэнтар з нагоды свайго прызначэньня.

3 студзеня мітрапаліт Менска-Магілёўскі Тадэвуш Кандрусевіч адзначае сваё 75-годзьдзе. У сувязі з гэтым узростам раней ён падаў заяву аб адстаўцы на імя папы Рымскага.

24 сьнежня Тадэвуш Кандрусевіч змог вярнуцца ў Беларусь пасьля чатырох месяцаў выгнаньня — улады абвінавацілі яго ў тым, што ён нібыта езьдзіць у Польшчу «па інструкцыі». Таксама вялася праверка, колькі сапраўды ў мітрапаліта грамадзянстваў.

Толькі пасьля ўмяшаньня Ватыкану кіраўніцтва Беларусі дазволіла Тадэвушу Кандрусевічу вярнуцца на радзіму. 17 сьнедня папскі пасланец Клаўдыё Гуджэроцьці, былы нунцый у Беларусі, сустрэўся з Аляксандрам Лукашэнкам.

31 жніўня памежнікі не прапусьцілі архібіскупа Кандрусевіча з Польшчы ў Беларусь без тлумачэньня прычынаў. Пазьней дзяржаўныя органы заявілі, што МУС прызнала пашпарт Кандрусевіча несапраўдным.

Аляксандар Лукашэнка вінаваціў Кандрусевіча ў тым, што мітрапаліт выяжджаў у Польшчу нібыта для кансультацый аб тым, «як разбураць Беларусь». Да таго Кандрусевіч асудзіў гвалт сілавікоў зь мірных пратэстоўцаў і заклікаў яго спыніць.

Што важна яшчэ ведаць пра Тадэвуша Кандрусевіча

Папа Бэнэдыкт XVI прызначыў арцыбіскупа Кандрусевіча Мітрапалітам Менска-Магілёўскім 21 верасьня 2007 г., перавёўшы яго з архідыяцэзіі Маці Божай у Маскве. З чэрвеня 2015 г. герарх зьяўляецца Старшынёй Канфэрэнцыі Каталіцкіх Біскупаў у Беларусі. Ён быў першым герархам Касьцёла ў Беларусі пасьля часоў камуністычнага перасьледу: 25 ліпеня 1989 г. Ян Павел ІІ прызначыў Кандрусевіча Апостальскім Адміністратарам Менскай дыяцэзіі для католікаў у Беларусі. Біскупскае пасьвячэньне, якое прайшло 20 кастрычніка 1989 г. у базыліцы сьвятога. Пятра ў Рыме, узначаліў яго сам Пантыфік.

Падчас свайго біскупскага служэння ў Беларусі ярарх заснаваў Гродзенскую вышэйшую духоўную сэмінарыю, спрыяў вяртаньню і адкрыцьцю каля 100 раней зачыненых касьцёлаў, прычыніўся да выданьня літургічнай літаратуры, распачаўшы такім чынам справу адраджэньня Касьцёла, працягнутую яго наступнікам кардыналам Казімірам Сьвёнткам.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG