Лінкі ўнівэрсальнага доступу

Паўла Севярынца пакінулі за кратамі яшчэ на два месяцы


Павал Севярынец, архіўнае фота
Павал Севярынец, архіўнае фота

Палітвязьню Паўлу Севярынцу 18 сьнежня працягнулі тэрмін утрыманьня пад вартай. Пра гэта паведаміла ў фэйсбуку ягоная жонка Вольга Севярынец.

24 сьнежня яна атрымала ліст ад Паўла Севярынца, у якім ён расказаў, што пра новы тэрмін — да 20 лютага 2021 году — яму паведаміў новы сьледчы ў ягонай справе.

«Аказаўся з Круглянскага раёну (Магілёўскай вобласьці) — відаць, у Менску жадаючыя скончыліся», — адзначыў Севярынец у лісьце.

Ён ня стаў падпісваць пастанову пра працяг сьледзтва, а яшчэ і сам папярэдзіў сьледчага.

«За фабрыкацыю крымінальнай справы будзе адказнасьць у адпаведнасьці з заканадаўствам. Вы, кажу, лепш займіцеся заявамі ад мірных грамадзянаў, якіх на вуліцы зьбіваюць невядомыя ў чорным. Маўчыць. Бачу, крыжык на шыі. У Бога верыце, кажу? Бог бачыць. Тут ён уперыў у мяне „цьвёрды позірк“, ды і хвіліны ня вытрымаў, вочы апусьціў. Потым яшчэ раз, але зноў — вочы долу. Грызе, відаць, сумленьне. Няхай Госпад прабачыць», — працытавала ліст Паўла Севярынца ягоная жонка.

Яна таксама зачытала віншаваньне з Раством, якое даслаў Севярынец.

«Сёлета Госпад адкрыў па-над нашай краінай неба. Сьвятло Божае праменіць зь Беларусі па ўсім сьвеце. Цуды здараюцца штодня», — напісаў Севярынец пра 2020 год, большую частку якога правёў за кратамі.

Севярынца затрымалі 7 чэрвеня, калі ён вяртаўся дахаты пасьля пікету па зборы подпісаў на Камароўскім рынку.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG