Як паведамляе Tut.by, былы дыплямат праз суд патрабуе зьмяніць у загадзе аб ягоным звальненьні фармулёўку прычыны звальненьня.
Астапенка падаў у адстаўку ў дзень інаўгурацыі Аляксандра Лукашэнкі, 23 верасьня, заявіўшы, што верыць «у лепшую будучыню для беларускага народу». 27 кастрычніка амбасадар адклікаў гэтую заяву і падаў новую, у якой запатрабаваў звальненьня са спасылкай на артыкул 41 Працоўнага кодэксу — у сувязі з парушэньнем наймальнікам заканадаўства. У заяве ён таксама падкрэсьліў, што цэлы шэраг дзеяньняў наймальніка стварае аб’ектыўныя ўмовы для непрызнаньня легітымнасьці кіраўніка дзяржавы і для міжнароднай ізаляцыі Беларусі.
3 лістапада Лукашэнка падпісаў указ аб звальненьні Астапенкі і пазбаўленьні яго дыпляматычнага рангу «ў сувязі з учыненьнем правіны, несумяшчальнай са знаходжаньнем на дыпляматычнай службе».
Астапенка ня згодны з такой фармулёўкай прычыны свайго звальненьня і падаў на Міністэрства замежных справаў пазоў у суд Ленінскага раёну Менску.
Сам былы амбасадар знаходзіцца не ў Беларусі і ўдзельнічаць у пасяджэньні мае намер празь відэасувязь — адвакат плянуе хадайнічаць пра гэта перад судом.
