Лінкі ўнівэрсальнага доступу

Сытуацыя з рахункамі атрымальнікаў дапамогі ад BY_help зьмянілася пасьля тлумачэньня Нацбанку


У лістападзе беларусы, якія атрымлівалі кампэнсацыі ад фонду BY_help, сутыкнуліся з блякаваньнем сваіх карт і замарозкай грошай на іх у памеры атрыманай выплаты.

Калі сродкаў на рахунку не хапала, балянс сыходзіў у мінус. У некаторых людзей не было магчымасьці атрымаць нават пэнсіі — яны цалкам сьпісваліся за кошт атрыманай раней выплаты ад BY_help. Як паведамляе tut.by, цяпер карты зноў запрацавалі, а грошы вярнуліся.

Пасьля шматлікіх зваротаў грамадзянаў і работнікаў банкаў Нацыянальны банк разаслаў ліст «Аб накладаньні арышту на грашовыя сродкі», пісаў раней infobank.by. У лісьце Нацбанк патлумачыў, што грошы, якія паступаюць з іншых крыніц, арышту не падлягаюць.

Tut.by цытуе неназванага супрацоўніка аднаго з банкаў: «У лісьце было апісана некалькі сытуацый. У прыватнасьці, адна з іх такая: грошы прыйшлі з крыніцы, якая падлягае арышту, былі цалкам выдаткаваныя і адсутнічаюць на рахунку. Празь нейкі час на рахунак паступілі грошы зь іншай крыніцы: гэта можа быць зарплата, пэнсія, дапамога, іншыя пералічэньні. Яны арышту не падлягаюць. Таму банкі перагледзелі ўмовы арышту і зьнялі блякаваньні».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG