Лінкі ўнівэрсальнага доступу

Былы палац Радзівілаў у Паланечцы прадалі на аўкцыёне. Яго выстаўлялі на продаж з 2013 году


Палац Радзівілаў у Паланечцы Баранавіцкага раёну. Архіўнае фота.

Комплекс будынкаў былога палаца Радзівілаў у вёсцы Паланечка Баранавіцкага раёну прадалі 4 сьнежня на паўторным аўкцыёне за 20 160 рублёў.

Аб’ект, які мае статус гісторыка-культурнай каштоўнасьці, быў выстаўлены на продаж з паніжэньнем пачатковай цаны на 80% — за 19 200 рублёў, бо на першым аўкцыёне палац ніхто не набыў, паведаміў БЕЛТА старшыня камітэту «Берасьцеаблмаёмасьць» Павал Манько. За суму, павялічаную на 5%, яго набыў адзіны ўдзельнік таргоў — індывідуальны прадпрымальнік зь Менску.

Новы ўласьнік плянуе аднавіць княскую сядзібу. У комплекс будынкаў уваходзяць двухпавярховы капітальны будынак плошчай 1,6 тыс. кв.м, пабудаваны ў 1836 годзе, сталоўка з трыма прыбудовамі й кацельня. Зямельны ўчастак плошчай 3,3 га выдаецца ў арэнду тэрмінам на 50 гадоў.

Па ўмовах продажу новы ўласнік абавязаны рэстаўраваць будынкі ў тэрміны, прадугледжаныя праектна-каштарыснай дакумэнтацыяй, падпісаць і зарэгістраваць у Міністэрстве культуры ахоўнае абавязаньне і выкарыстоўваць аб’ект на працягу 3 гадоў з моманту ўводу ў эксплюатацыю.

Будынак былога палаца Радзівілаў Баранавіцкі райвыканкам спрабаваў прадаць з 2013 году. За гэты час яго цана зьнізілася амаль у шэсьць разоў. У 2014 годзе са зьніжэньнем цаны на 50% палацавы комплекс набыло менскае ТАА «Спецактыўбуд-інвест». Аднак, не знайшоўшы інвэстара, фірма ня здолела выплаціць канчатковую суму, і ў 2016 годзе комплекс вярнуўся ў камунальную ўласнасьць раёна.

Палац у вёсцы Паланечка — помнік архітэктуры клясыцызму. Ён пабудаваны ў другой палове XVIII стагодзьдзя на загад Мацея Радзівіла. Нашчадкі Радзівілаў жылі ў Паланечцы да прыходу Савецкага Саюзу ў 1939 годзе. Пасьля вайны ў палацы месьцілася школа-інтэрнат. З 1999 году палац пустуе.

Перадача з цыклю «Падарожжы Свабоды» пра вёску Паланечка

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG