Ленінскі суд Менску прысудзіў карэспандэнту БелаПАН Максіму Лаўрэцкаму 15 сутак арышту за нібыта ўдзел у акцыі пратэсту пэнсіянэраў 16 лістапада, якую ён асьвятляў.
Працэс вяла судзьдзя Тацяна Шоцік.
Згодна з пратаколам міліцыі, падпісаным Зінкевічам, каля 15.00 па адрасе Незалежнасьці, 36 Лаўрэцкі «актыўна ўдзельнічаў у масавым мерапрыемстве з мэтай публічнага выказваньня пратэсту па факце правядзеньня прэзыдэнцкіх выбараў», а таксама «рухаўся разам з групай грамадзян і выкрыкваў лёзунг «Жыве Беларусь».
Лаўрэцкі, які знаходзіцца ў ІЧУ на Акрэсьціна і ўдзельнічаў у судзе праз скайп, расказаў, што выйшаў з мэтро і чакаў на прыпынку транспарту, пакуль па праспэкце спусьціцца калёна мітынгоўцаў. Праз паўхвіліны пад’ехаў бусік. Пяць чалавек у чорнай форме АМАПа ўзялі яго пад рукі і зацягнулі ў бус. Не прадстаўляліся, не паказвалі дакумэнтаў. Мэты затрыманьня не паведамлялі. Адзін з амапаўцаў у мікрааўтобусе намякнуў, што бачыў яго на ранейшых акцыях.
Журналіст заявіў, што ня ўдзельнічаў у мітынгу і нават не пасьпеў убачыць яго ўдзельнікаў. Лёзунгаў не выкрыкваў. Знаходзіўся там па рэдакцыйным заданьні, каб зрабіць фота.
Абаронца Лаўрэцкага Андрэй Мачалаў паведаміў, што ў пратаколе міліцыі не пазначаныя мэты затрыманьня. Ён заявіў судзьдзі хадайніцтвы, што яго не дапусьцілі да падабароннага ў РУУС, не далі часу азнаёміцца са справай. Абаронца таксама выказаў скаргу, што падчас яго канфідэнцыйнай размовы з Лаўрэцкім у залі неправамерна прысутнічала прадстаўніца суду Натальля Новікава. Таксама абаронца паскардзіўся, што яго выдалілі з залі падчас устанаўленьня асобы сьведкі, і запатрабаваў адводу судзьдзі, бо яна «не зацікаўленая ў вынясеньні бесстароннага прысуду».
Шоцік адхіліла ўсе хадайніцтвы.
Сьведка Варанцоў, супрацоўнік міліцыі, не прысутнічаў у залі, а быў перад камэрай «зь мяшком на галаве», як адвакат апісаў шчыльную балаклаву без выразных разрэзаў для вачэй. Ён сказаў, што назіраў за затрыманьнем з боку.
Сьведка паўтарыў запісанае ў пратаколе, што Лаўрэцкі знаходзіўся ў групе грамадзян, выкрыкваў «правакацыйныя» лёзунгі.
Адвакат Мачалаў заўважыў, што сьведку пры адказе на яго пытаньні падказвала неўстаноўленая асоба за кадрам. Судзьдзя адхіліла патрабаваньне раскрыць месцазнаходжаньне сьведкі-міліцыянта. Яна таксама адмовіла ў хадайніцтве далучыць да справы відэаматэрыялы з тэлефона Лаўрэцкага і з камэр відэаназіраньня ў раёне затрыманьня.
Адвакат зьвярнуў увагу на факталягічныя несупадзеньні ў паказаньнях сьведкі адносна месца затрыманьня Лаўрэцкага і характару пратэставай акцыі.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў