Кіравала старшыня Бараўлянскага сельсавету Жанна Варабей. Зачышчалі ў два этапы – спачатку прыбралі зьнічкі і кветкі, пазьней – саскрэблі налепкі, прыбралі партрэты і дзіцячыя малюнкі.
А 12-й гадзіне ў панядзелак мэмарыял на цэнтральнай плошчы Новай Баравой яшчэ быў. Бліжэй да абеду прыйшлі працаўнікі камунальнай службы і прыбралі кветкі і зьнічкі.
У Новай Баравой цяпер праблема з вадой, валянтэры прывезьлі плястыкавыя бутлі і паставілі побач з мэмарыялам. Людзі падыходзілі і бралі ваду.
А 16-й гадзіне камунальнікі вярнуліся. Саскрабаючы налепкі, яны хавалі свае твары.
Побач зьявіўся серабрысты мікрааўтобус, зь якога выйшла жанчына ў шэрай куртцы, вельмі падобная да той, якая кіравала першай «зачысткай» мэмарыялу, і мужчына.
Прысутныя апазналі ў ёй старшыню Бараўлянскага сельсавету Жанну Варабей. На пытаньне, навошта яны гэта робяць, спадарыня Варабей адказала:
«Мяне мама ў дзяцінстве вучыла зь незнаёмымі людзьмі на вуліцы не размаўляць».
Працавалі камунальнікі пад прыкрыцьцём двух байцоў АМАПу.
Увечары людзі пачалі зноў ствараць мэмарыял, падыходзілі са зьнічкамі і кветкамі.
