Лінкі ўнівэрсальнага доступу

Адвакатка Калесьнікавай падала заяву аб яе вызваленьні пад заклад. Палітзьняволеная цяпер на карантыне як кантакт першага ўзроўню


Марыя Калесьнікава.
Марыя Калесьнікава.

Адвакатка сябра Каардынацыйнай рады Марыі Калесьнікавай Людміла Казак паведаміла Свабодзе, што яе падабаронная цяпер знаходзіцца на карантыне ў камэры ў сьледчым ізалятары ў Жодзіне:

«Уся камэра на карантыне як кантакты першага ўзроўню. Марыя і яе сукамэрніцы ў поўнай ізаляцыі: на прагулку іх не выводзяць, на прыёмы не дапускаюць, ніхто да іх у камэру не заходзіць. І я таксама не магу яе наведаць. Я спадзяюся, што гэта скончыцца неўзабаве, у іх узялі аналізы, чакаюцца вынікі».

У камэры тры чалавекі, на ўмовы ўтрыманьня Калесьнікава ня скардзіцца. Апошні раз адвакатка бачыла Калесьнікаву 22 кастрычніка. Цяпер яна падала ў Сьледчы камітэт хадайніцтва аб вызваленьні Марыі пад заклад.

«Мы ўжо прасілі перавесьці яе пад хатні арышт — адмовілі, пад асабістае паручальніцтва — адмовілі, зараз спрабуем вызваліць пад заклад. Адказу пакуль няма. Яшчэ будзем прасіць вызваліць пад падпіску аб нявыезьдзе».

Гэтыя хадайніцтвы аргумэнтаваныя ў тым ліку тым, што шэраг іншых палітвязьняў раней вызвалілі з ізалятараў пасьля сустрэчы Лукашэнкі зь імі ў СІЗА КДБ. Калесьнікава на гэтую сустрэчу ехаць адмовілася.

Цяпер Калесьнікава, а таксама адвакат Максім Знак утрымліваюцца пад вартай у якасьці абвінавачаных па ч. 3 арт. 361 КК Беларусі (заклікі да дзеяньняў, накіраваных на шкоду зьнешняй бясьпекі Рэспублікі Беларусь, яе сувэрэнітэту, тэрытарыяльнай недатыкальнасьці, нацыянальнай бясьпецы і абараназдольнасьці).

Беларускія праваабарончыя арганізацыі прызналі іх палітвязьнямі.

Калесьнікаву затрымалі 8 верасьня на беларуска-ўкраінскай мяжы. За дзень да таго яе захапілі невядомыя ў цывільным, а потым спрабавалі гвалтам вывезьці ва Ўкраіну, але Калеснікава парвала пашпарт і пакінула аўтамабіль падчас спробы прымусовай дэпартацыі з Беларусі.

Адвакатка абскарджвае і сваё пакараньне

Сама адвакатка Людміла Казак працягвае абскарджваць сваё незаконнае затрыманьне і штраф за непадпарадкаваньне супрацоўнікаў міліцыі:

«Гэта адбірае ў мяне сілы, таму што я вымушана адцягваць увагу на шматлікія скаргі, якія я пішу і ў МУС і пракуратуру. Цяпер на цэлую гару маіх скаргаў прыйшлі скупыя адказы, у якіх пішуць, што мы вашыя скаргі разглядаць ня будзем. Усё ўпіраецца ў глухую сьцяну нежаданьня што-небудзь рабіць. Апошні нэгатыўны адказ быў з пракуратуры Менску», — паведаміла адвакатка.

Чакаецца, што неўзабаве скаргу Казак на вырак будзе разглядаць суд Менску.

25 верасьня Людмілу Казак, якая абараняе сябра Каардынацыйнай рады Марыю Калесьнікаву, пакаралі штрафам у 675 рублёў за непадпарадкаваньне супрацоўнікам міліцыі (арт. 23.4 КаАП). Пасьля абвяшчэньня прысуду ў залі крычалі «Ганьба!»

Паводле пратаколу, 24 верасьня ў 13:55 па вуліцы Камуністычнай, 5 Людміла Казак падчас свайго затрыманьня супраціўлялася сяржанту міліцыі Іванову Івану Іванавічу: размахвала рукамі, упіралася нагамі, спрабавала ўцячы і не хацела ісьці ў аўтамабіль.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG