На Кіпры абвясьцілі аб спыненьні так званай праграмы «залатых пашпартоў», якая дазваляла атрымаць грамадзянства Кіпру, краіны Эўразьвязу, уклаўшы ў кіпрскую эканоміку і нерухомасьць агулам два з паловай мільёны эўраў. Афіцыйная назва праграмы — «Грамадзянства ў абмен на інвэстыцыі».
Напярэдадні гэтага рашэньня ўладамі Кіпру катарскі тэлеканал Al Jazeera паказаў рэпартаж-расьсьледаваньне, у якім журналіст, які выдаваў сябе за кітайца з крымінальным мінулым, дамовіўся аб атрыманьні кіпрскага грамадзянства з дэпутатамі кіпрскага парлямэнту — уладальнікам будаўнічай карпарацыі, камуністам з партыі АКЭЛ Хрыстакісам Джаванісам і з старшынём парлямэнту Кіпру Дымітрысам Сылюрысам. «Прэтэндэнт на грамадзянства» не хаваў, што ў КНР яго вінавацяць у карупцыі і могуць адправіць у турму на доўгі тэрмін, а адвакат, які суправаджае ўгоду, абяцае вырашыць і праблему зьмены імя ў пашпарце, каб унікнуць далейшых перасьледаў. Здымкі вяліся схаванай камэрай.
Прэзыдэнт Кіпру Нікас Анастасіядыс распарадзіўся стварыць камісію для расьсьледаваньня фактаў з рэпартажу Al Jazeera. У Нікасіі прайшлі дэманстрацыі пратэсту супраць злоўжываньняў пры наданьні кіпрскага грамадзянства. Праграма «залатых пашпартоў» дзейнічала з 2002 году і прынесла ў дзяржаўны скарб мільярды даляраў.
Паводле выданьня EUobserver, якое спасылаецца на тэлеканал Al Jazeera, прынамсі 19 грамадзян Беларусі, у тым ліку бізнэсоўцы ды іхныя сем’і, купілі кіпрскія пашпарты з 2017 па 2019 год.
Кіпрскае выданьне Politis называе два прозьвішчы грамадзян Расеі, зьвязаных зь Беларусьсю, якія атрымалі «залатыя пашпарты» за інвэстыцыі з 2008 па 2012 год: Ігар Шаталаў (былы чалец рады дырэктараў «Белгазпрамбанку») і Ігар Макараў (ганаровы консул Беларусі ў Маскве).
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў