Лінкі ўнівэрсальнага доступу

Ва Ўкраіне адкрылі памятную дошку Васілю Быкаву


У сяле Вялікая Севярынка Кіраваградзкай вобласьці адкрылі мэмарыяльную дошку беларускаму пісьменьніку Васілю Быкаву.

У часе Другой усясьветнай вайны Васіль Быкаў удзельнічаў у баях за вызваленьне гэтага сяла і быў цяжка паранены. Яго памылкова ўнесьлі ў сьпіс загінулых, а потым увекавечылі ягонае імя на абэліску, пастаўленым на сельскай брацкай магіле.

Гэтыя аўтабіяграфічныя факты беларускі пісьменьнік адлюстраваў у рамане «Мёртвым не баліць», які выйшаў у 1965 годзе. У тым жа годзе Быкаў наведаў Вялікую Севярынку і доўга сядзеў каля абэліска. Відавочцы казалі, што прапанавалі выкрасьліць ягонае імя з абэліска, але ён адмовіўся.

Быкаў называў Вялікую Севярынку сваёй роднай вёскай, бо лічыў, што тут ён нарадзіўся другі раз.

«Я памятаю шмат вёсак Кіраваградзкай вобласьці, але асабліва — Вялікую Севярынку, у баі пад якой я быў цяжка паранены. Лічуся пахаваным у брацкай магіле ў сяле Вялікая Севярынка, пра што паведамілі маім родным. Але, як бачыце: выжыў!» — пісаў Васіль Быкаў у сваіх лістах.

З ініцыятывай усталяваць памятную дошку Васілю Быкаву выступілі мясцовыя жыхары, іх падтрымалі сельскія ўлады. У цырымоніі адкрыцьця ўзяў удзел і амбасадар Беларусі ва Ўкраіне Ігар Сокал. Раней беларускія дыпляматы адмовіліся ад удзелу ў адкрыцьці помніка Яну Баршчэўскаму ў Чуднаве Жытомірскай вобласьці.

У гэтым украінскім сяле ёсьць вуліца імя Васіля Быкава і ягоны музэй.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG