Лінкі ўнівэрсальнага доступу

Віктар Бабарыка зьвярнуўся ў Міністэрства юстыцыі — ягонага адваката хочуць пазбавіць ліцэнзіі


Віктар Бабарыка, архіўнае фота
Віктар Бабарыка, архіўнае фота

Былы прэтэндэнт на пасаду прэзыдэнта Беларусі, экс-кіраўнік «Белгазпрамбанку» Віктар Бабарыка напісаў у Міністэрства юстыцыі зварот у сувязі з выклікам аднаго зь ягоных абаронцаў Аляксандра Пыльчанкі на пасяджэньне кваліфікацыйнай камісіі пры міністэрстве.

Як паведаміў БелаПАН адвакат Дзьмітры Лаеўскі, 9 кастрычніка яны з Пыльчанкам наведалі Бабарыку ў СІЗА КДБ і расказалі яму пра выклік Пыльчанкі на пасяджэньне кваліфікацыйнай камісіі 15 кастрычніка, дзе будуць разглядаць спыненьне яго ліцэнзіі на адвакацкую дзейнасьць. У сувязі з гэтым Бабарыка напісаў зварот у міністэрства.

«Намер пазбавіць майго абаронцу ліцэнзіі я ацэньваю як парушэньне майго права на абарону і ціск на мяне. Я ўжо ня маю магчымасьці скарыстацца юрыдычнай дапамогай адваката Максіма Знака, якому была выдадзена даверанасьць на прадстаўленьне маіх інтарэсаў у судах, у тым ліку ў пытаньнях выбарчых правоў. Цяпер ён знаходзіцца пад вартай», — заявіў Бабарыка ў сваім звароце.

Манэру, у якой ліквідуюць Пыльчанку як адваката, Бабарыка лічыць «спосабам процідзеяньня наданьню юрыдычнай дапамогі».

«Прашу цяперашнюю заяву разгледзець на пасяджэньні кваліфікацыйнай камісіі ў пытаньнях адвакацкай дзейнасьці, ўлічыць маё меркаваньне і паведаміць мне пра вынікі разгляду заявы», — піша Бабарыка.

7 кастрычніка Аляксандру Пыльчанку ўручылі ў Міністэрстве юстыцыі апавяшчэньне аб разглядзе спыненьня дзеяньня яго ліцэнзіі на адвакацкую дзейнасьць. Пытаньне будуць разглядаць 15 кастрычніка. Што стала падставай для гэтага, пакуль невядома.

Віктар Бабарыка пад вартай ужо больш за тры месяцы. Яго затрымалі 18 чэрвеня разам з сынам Эдуардам. Бабарыку выставілі абвінавачаньне паводле трох артыкулаў Крымінальнага кодэксу: ч. 2 арт. 235 (легалізацыя сродкаў, атрыманых злачынным шляхам), ч. 2 арт. 243 (ухіленьне ад выплаты падаткаў, збораў) і ч. 2 арт. 431 (даваньне хабару). Праваабаронцы прызналі яго палітвязьнем.

Перасьлед Віктара Бабарыкі і яго прыхільнікаў. Што важна ведаць

  • Віктара Бабарыку абвінавацілі ў «адмываньні» сродкаў, атрыманых злачынным шляхам (па частцы 2 арт. 235 КК), і атрыманьні хабару ў асабліва буйным памеры (па частцы 3 арт. 430 КК).
  • У крымінальнай справе «Белгазпрамбанку» 122 тамы. Справу разглядаў Вярхоўны суд у будынку суду Маскоўскага раёну.
  • 22 сакавіка абарона Бабарыкі заявіла пярэчаньні на прад’яўленыя абвінавачаньні, бо апісаньне, якое ёсьць у іх, не дазваляла ў дастатковай ступені зразумець, у якіх менавіта дзеяньнях абвінавачанага Бабарыкі ўгледзілі злачынства, заявіў адвакат Дзьмітры Лаеўскі. Таксама ён адзначыў, што ў абвінавачаньні няма апісаньня інкрымінаваных дзеяньняў з указаньнем часу, месца, спосабу, іншых абставінаў іх учыненьня. Адвакат папрасіў далучыць да матэрыялаў справы дакумэнт, у якім выклаў «дэфэкты абвінавачаньня».
  • Віктар Бабарыка віны не прызнае.​

Хроніка перасьледу

  • 10 чэрвеня Аляксандар Лукашэнка даручыў заняцца праверкамі прыватных кампаніяў, якія нібыта звальняюць тых, хто адмаўляецца ставіць подпісы за вылучэньне альтэрнатыўных кандыдатаў. Ён загадаў «прашарсьціць гэтых пузатых буржуяў, каб яны несьлі адказнасьць за людзей».
  • 11 чэрвеня ў «Белгазпрамбанку» і шэрагу іншых кампаній, у знаёмых патэнцыйнага кандыдата ў прэзыдэнты Віктара Бабарыкі прайшлі ператрусы. Камітэт дзяржкантролю заявіў аб завядзеньні крымінальных спраў за адмываньне грошай і ўхіленьне ад выплаты падаткаў у асабліва буйным памеры.
  • Віктар Бабарыка назваў гэта атакай на яго асабіста, хоць сам у справе тады не фігураваў, і заявіў пра «палітычны характар» дзеяньняў сьледчых, якія ня маюць прамога кампрамату на яго.
  • 11 чэрвеня арыштавалі каардынатарку выбарчага штабу Бабарыкі Сьвятлану Купрэеву па абвінавачаньні ва ўхіленьні ад выплаты падаткаў у асабліва буйным памеры.
  • 12 чэрвеня Лукашэнка заявіў, што Бабарыка таксама датычны да справы, маўляў, «​гэта адна шайка-лейка». Праз 4 гадзіны Дзяржкантроль заявіў, што мае доказы датычнасьці былога банкіра да злачынстваў.
  • Фігурантамі «справы „Белгазпрамбанку“» сталі каля 20 чалавек.
  • 15 чэрвеня Нацыянальны банк прызначыў у «Белгазпрамбанку» часовую адміністрацыю на чале з Надзеяй Ермаковай. Расейскія акцыянэры банку («Газпромбанк» і «Газпром») назвалі гэтае рашэньне незаконным.
  • 17 чэрвеня ўлады арыштавалі без тлумачэньняў выбарчы фонд Віктара Бабарыкі з 100 тысячамі рублёў на рахунку.
  • 18 чэрвеня затрымалі Віктара Бабарыку і яго сына Эдуарда Бабарыку — кіраўніка ініцыятыўнай групы. У дамах сям’і Бабарыкаў прайшлі ператрусы.
  • Кіраўнік КДК Іван Тэртэль назваў Бабарыку «непасрэдным арганізатарам» «махлярскай схемы з адмываньнем грошай» з удзелам былых і дзейных топ-мэнэджараў «Белгазпрамбанку».
  • 19 чэрвеня праваабаронцы прызналі палітвязьнямі Віктара, Эдуарда Бабарыкаў і затрыманых сябраў ініцыятыўнай групы.
  • Штаб Бабарыкі падрыхтаваў да здачы 435 тысяч подпісаў.
  • 20 чэрвеня адвакаты падалі пакет дакумэнтаў для рэгістрацыі Віктара Бабарыкі кандыдатам у прэзыдэнты.
  • 2 ліпеня стала вядома, што Бабарыку вінавацяць па трох фінансавых артыкулах Крымінальнага кодэксу.
  • 14 ліпеня ЦВК адмовіў Віктару Бабарыку ў рэгістрацыі празь неадпаведнасьць прадстаўленай дэклярацыі аб даходах і маёмасьці.
  • 10 кастрычніка Лукашэнка сустрэўся зь Віктарам Бабарыкам і іншымі палітвязьнямі ў СІЗА КДБ.
  • 17 лютага 2021 году пачаўся суд над Віктарам Бабарыкам і былымі супрацоўнікамі «Белгазпрамбанку». На працэс не пусьцілі нікога зь незалежных журналістаў.
  • 6 ліпеня Бабарыку асудзілі на 14 гадоў пазбаўленьня волі. Вырак вынес судзьдзя Ігар Любавіцкі. Бабарыка не прызнаў віны, ягоныя абаронцы яшчэ раз заявілі аб палітычных матывах справы.
  • 12 ліпеня стала вядома, што Бабарыку этапавалі ў ПК №1 у г. Наваполацак.
  • 12 кастрычніка з ізалятараў выйшлі некалькі чалавек, затрыманых у справе «Белгазпрамбанку»​. Ім зьмянілі меру стрыманьня, але іншыя падрабязнасьці справы невядомыя.
  • У кастрычніку 2023 году арганізацыя былых сілавікоў BelPol паведамляла, што Віктар Бабарыка ў калёніі мае праблемы з сэрцам. Паводле інфармацыі арганізацыі, Бабарыку нанесьлі «сур’ёзныя цялесныя пашкоджаньні», прычым зрабілі гэта людзі, якія не адносяцца да пэрсаналу наваполацкай калёніі, дзе той сядзіць.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG