Лінкі ўнівэрсальнага доступу

Прэзыдэнт Кіргізстану ўвёў надзвычайнае становішча ў Бішкеку


Сёньняшні пратэст у Бішкеку.

Прэзыдэнт Кіргізстану Сааранбай Жээнбекаў 9 кастрычніка падпісаў указ аб увядзеньні на тэрыторыі Бішкеку рэжыму надзвычайнага становішча, паведамляецца на сайце кіраўніка дзяржавы.

Надзвычайнае становішча ўводзіцца з 20.00 гадзін вечара 9 кастрычніка да 8.00 гадзіне 21 кастрычніка 2020 году.

Камэндантам гораду на пэрыяд надзвычайнага становішча прызначаны намесьнік міністра ўнутраных спраў Алмазбек Аразаліеў.

Ва ўказе гаворыцца, што такое рашэньне прынятае «выключна ў інтарэсах забесьпячэньня абароны жыцьця і здароўя грамадзян, іх бясьпекі, а таксама ў мэтах найхутчэйшай стабілізацыі сытуацыі і навядзеньня грамадзкага парадку ў Бішкеку».

Дакумэнт дазваляе:

  • уводзіць камэнданцкую гадзіну;
  • уводзіць адмысловы рэжым ўезду і выезду грамадзян;
  • забараняць асобным грамадзянам пакідаць свае дамы;
  • забараняць правядзеньне масавых мерапрыемстваў, забастовак, сходаў, мітынгаў, шэсьцяў і пікетаў;
  • высылаць парушальнікаў парадку, якія пражываюць не ў сталіцы, у тым ліку іншаземцаў, за іх кошт да месца свайго пастаяннага знаходжаньня;
  • усталёўваць асаблівы рэжым працы прадпрыемстваў і арганізацый;
  • забараняць звальненьні працоўных і служачых па ўласным жаданьні;
  • уводзіць кантроль за СМІ, калі іх могуць выкарыстоўваць для нагнятаньня абстаноўкі ў Бішкеку;
  • уводзіць асаблівыя правілы карыстаньня сувязьзю;
  • абмяжоўваць рух транспартных сродкаў, у тым ліку замежных, і праводзіць іх дагляд, за выключэньнем транспарту дыпляматычных службаў;
  • правяраць дакумэнты ў месцах масавага збору грамадзян.

Генэральнаму штабу Ўзброеных сіл загадана ўвесьці ў Бішкек вайскоўцаў і тэхніку для арганізацыі блёк-пастоў, стрымліваньня узброеных сутыкненьняў, забесьпячэньня аховы правапарадку і абароны мірнага насельніцтва.

Ураду даручылі прадугледзець неабходныя сродкі для забесьпячэньня рэжыму надзвычайнага становішча.

СМІ ў пэрыяд ўвядзеньня надзвычайнага здарэньня загадана распаўсюджваць інфармацыю, прадстаўленую камэндантам у мэтах выключэньня нагнятаньня сытуацыі.

У Кіргізстане 5 кастрычніка пасьля абвяшчэньня вынікаў парлямэнцкіх выбараў пачаліся пратэсты, якія перарасьлі ў беспарадкі. У ноч на 6 кастрычніка дэманстранты занялі Белы дом, у якім засядае парлямэнт і знаходзіцца апарат прэзыдэнта, а таксама вызвалілі з-за кратаў шэраг палітыкаў. Прэзыдэнт Сааранбай Жээнбекаў расцаніў падзеі ў краіне як «спробу захопу ўлады» і заявіў, што застаецца легітымным кіраўніком Кіргізстану. Паведамляецца, што ў краіне дзейнічаюць некалькі палітычных груп і каардынацыйных радаў.

9 кастрычніка Жээнбекаў падпісаў указ аб адстаўцы прэм’ер-міністра краіны Кубатбека Баронава і ўраду. Таксама сваім указам прэзыдэнт зьняў Аразбека Апумбаева з пасады старшыні Дзяржаўнага камітэту нацыянальнай бясьпекі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG