Агульная колькасьць пацьверджаных выпадкаў каранавіруснай інфэкцыі COVID-19 у Беларусі дасягнула 79.019, памерла 839 чалавек, паведаміла Міністэрства аховы здароўя.
За апошнія суткі зафіксавана:
- 388 новых выпадкаў заражэньня,
- 6 сьмерцяў,
- 252 чалавек паправіліся і выпісаныя.
Прырост новых выпадкаў інфэкцыі працягвае павялічвацца. 30 верасьня, паводле афіцыйнай статыстыкі, быў 371 новы выпадак і пяць сьмерцяў, яшчэ тыдзень таму, 23 верасьня — 253 новыя выпадкі і 5 сьмерцяў за суткі, а месяц таму, 1 верасьня — 119 новых выпадкаў і 5 сьмерцяў за суткі.
Міністэрства аховы здароўя адзначае, што з пачатку эпідэміі COVID-19 у Беларусі паправіліся і выпісаныя 74 777 пацыентаў. Праведзена 1 877 440 тэстаў на каранавірус, у тым ліку за мінулыя суткі — 18.708.
Міністэрства аховы здароўя зь вясны не публікуе статыстыку хворых па абласьцях і Менску, а таксама цяжкіх хворых, якія знаходзяцца на апаратах штучнай вэнтыляцыі лёгкіх. Больш за 5 месяцаў міністэрства не праводзіць прэс-канфэрэнцыі па сытуацыі з каранавірусам у Беларусі.
1 кастрычніка ў Беларусі пачалася вакцынацыя добраахвотнікаў у рамках правядзеньня дасьледаваньня расейскай вакцыны ад каранавірусу «Спадарожнік V».
