Радыё «Сталіца» запусьціла ў ратацыю «сацыяльную рэкляму» Міністэрства ўнутраных спраў.
Ананімны прадстаўнік ведамства зьвяртаецца да грамадзянаў Беларусі з папярэджаньнем «не паддавацца на правакацыі сумнеўных асобаў», якія заклікаюць далучацца да несанкцыянаваных акцый.
Ён папярэджвае, што за ўдзел у такім «незаконным мерапрыемстве» пагражае адміністрацыйная адказнасьць, а за арганізацыю масавых беспарадкаў — да 15 гадоў зьняволеньня паводле арт. 293 Крымінальнага кодэксу. Такое пакараньне сапраўды прапісанае ў беларускім Крымінальным кодэксе
У другой палове жніўня большая частка калектыву радыё «Сталіца» напісала заявы на звальненьні. Разам з супрацоўнікамі сышлі дырэктар Алег Міхалевіч і загадчыца аддзелу інфармацыйных праграмаў Ала Рыжэвіч.
Да таго журналісты паведамілі свайму кіраўніцтву пра страйк. Сярод патрабаваньняў былі наступныя пункты:
- правядзеньне новых сумленных выбараў прэзыдэнта
- спыненьне гвалту ў дачыненьні да мірных людзей
- перавесьці забаўляльны эфір у абʼектыўнае асьвятленьне падзеяў.
Аднак патрабаваньні калектыву «Сталіцы» былі праігнараваныя. У выніку супрацоўнікі масава звольніліся.
Цяпер на радыёстанцыі адбываецца працэс перафарматаваньня: канцэпцыя з ухілам у сусьветную і беларускую рок-музыку замяняецца папулярным кантэнтам.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў