Лінкі ўнівэрсальнага доступу

Старшыня Эўрапейскай рады ў ААН заявіў пра «інклюзіўны нацыянальны дыялёг пры садзейнічаньні АБСЭ» для Беларусі


Шарль Мішэль

25 верасьня старшыня Эўрапейскай рады Шарль Мішэль з трыбуны Генасамблеі ААН заявіў, што Эўразьвяз не прымае сфальсыфікаваных вынікаў прэзыдэнцкіх выбараў, паведамляецца на сайце Эўрапейскай рады.

«У Беларусі былі сфальсыфікаваныя апошнія прэзыдэнцкія выбары. Мы не прымаем іх вынікі. І мы асуджаем жорсткія рэпрэсіі ў дачыненьні да апазыцыі і мірных дэманстрацый», — заявіў Шарль Мішэль.

Ён падкрэсьліў, што ўсе рэпрэсіі і запалохваньні павінны быць спыненыя, а ўсіх вінаватых належыць прыцягнуць да адказнасьці і пакараць.

«Мы падтрымліваем беларускі народ, які павінен быць вольны, безь якога-небудзь вонкавага прымусу, выбіраць сваю будучыню. Інклюзіўны нацыянальны дыялёг пры садзейнічаньні АБСЭ — адзіны рэальны шлях наперад», — дадаў Шарль Мішэль.

У Дэклярацыі ад імя Эўразьвязу «з нагоды так званай інаўгурацыі Аляксандра Лукашэнкі», апублікаванай 24 чэрвеня, Эўразьвяз паўтарыў, што «прэзыдэнцкія выбары ў Беларусі 9 жніўня не былі ні свабоднымі, ні справядлівымі», а «так званая інаўгурацыя 23 верасьня 2020 году і новы мандат, на які прэтэндуе Аляксандар Лукашэнка, пазбаўленыя якой-небудзь дэмакратычнай легітымнасьці».

У дэклярацыі падкрэсьліваецца, што гэтая «інаўгурацыя» наўпрост супярэчыць волі шырокіх слаёў насельніцтва Беларусі, і Эўразьвяз цалкам падтрымлівае дэмакратычнае права беларускага народу абраць свайго прэзыдэнта з дапамогай новых свабодных і справядлівых выбараў пад наглядам БДІПЧ АБСЭ.

Таксама ў дэклярацыі ўказваецца, што ў кантэксьце бягучай сытуацыі Эўразьвяз пераглядае свае адносіны зь Беларусьсю.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG