Менск: у раёне Пушкінскай сілавікі ўжылі газ
У раёне Пушкінскай сілавікі ўжылі газ. Відавочцы перадаюць, што быў чуваць гучны хлапок, паведамляе Onliner.
На Пушкінскай працягваюцца канфлікты паміж сілавікамі і пратэстоўцамі.
Менск: пратэсты ў розных раёнах працягваюцца, пратэстоўцы перакрываюць дарожны рух
На плошчы Перамогі абгароджаны манумэнт. Тут знаходзіцца некалькі дзясяткаў пратэстоўцаў. У цэнтар горада праехалі 12 машын з сілавікамі, паведамляе Tut.by.
Каля Стэлы з боку праспэкта Машэрава выстаўлена ачапленьне. Людзі ў чорным заблякавалі дарогу для мінакоў. Яны рушылі па праспэкце Машэрава.
Каля «Рыгі» мікрааўтобусы сілавікоў зьехалі. Людзі сабраліся. Сілавікі вярнуліся і зноў іх разагналі.
На вуліцы Прытыцкага каля крамы «Грын» людзі са сьцягамі заблякавалі рух.
Перакрыты рух на Кальварыйскай, гэтаксама як і ў Серабранцы. У Малінаўцы, на Усходзе і ў Каменнай горцы пратэстоўцы таксама перакрылі дарогі.
Менск: на Нямізе прагучалі два стрэлы, сілавікі працягваюць біць і затрымліваць людзей
У Менску на Нямізе 50 чалавек заблякавалі мікрааўтобус, у які невядомыя ў цывільным з дубінкамі завялі дваіх пратэстоўцаў. Пры гэтым людзі перакрылі вуліцу Багдановіча. На іх кінулася вялікая група апэратыўнікаў у джынсах і ў шлемах, яны разагналі натоўп. У выніку аўтобус поўны затрыманых зьехаў.
Каля Петрапаўлаўскай царквы на вуліцы Няміга прагучала два стрэлы.
На Нямізе каля «Бургер-кінга» працягваюцца затрыманьні, людзей б'юць і цягнуць у аўтобус. Людзі крычаць.
Карэспандэнт Свабоды бачыў, як шэсьць апэратыўнікаў у джынсах і красоўках захапілі аднаго пратэстоўца, пабілі, пацягнулі яго па зямлі і закінулі ў аўтобус. Людзі крычаць: «Ганьба!», «Жыве Беларусь!». Машыны сыгналяць на знак падтрымкі.
Хутка ў падтрымку апэратыўнікам у цывільным на Нямігу прыехалі аўтобусы з АМАПам у чорным. Аўтазакі перагарадзілі вуліцу Нямігу, АМАПаўцы б'юць і затрымліваюць людзей.
У РУУС Цэнтральнага раёну прыехала «хуткая», кагосьці забралі на насілках
У РУУС Цэнтральнага раёну на вуліцы Арлоўскай у Менску прыехала «хуткая дапамога», каля 20.55 з РУУС на насілках вынесьлі чалавека і забралі яго на «хуткай», паведамляе Тэлеграм-канал motolkohelp.
У сьпісе «Вясны» ўжо больш за 50 затрыманых
У сьпісе праваабаронцаў «Вясны» ўжо больш за 50 прозьвішчаў затрыманых на вечаровых акцыях пратэсту пасьля інаўгурацыі Лукашэнкі па ўсёй Беларусі (Менск, Наваполацак, Магілёў, Сьмілавічы, Берасьце, Паставы, Гомель, Маладэчна). Сьпіс абнаўляецца.
Акцыя пратэсту ў Берасьці
Менск: акцыі і затрыманьні ў розных раёнах гораду
Гомель: акцыю пратэсту правесьці не ўдалося, АМАП затрымаў большасьць удзельнікаў
У Гомлі людзі спрабавалі правесьці акцыю пратэсту супраць інаўгурацыі. Пунктам збору быў чыгуначны вакзал. Па стане на 18.00 там сабраліся міліцыянты, АМАП і вайсковыя грузавікі з аўтазакамі. У тэлеграм-каналах было вырашана зьмяніць пункт збору на цэнтральны рынак. Некаторыя людзі пайшлі туды, іх затрымалі.
Потым частка людзей сабралася каля ўнівэрмагу (чалавек сорак) і рушыла ў бок цырку. АМАП завярнуў іх назад. Людзі пайшлі па другім баку Савецкай. З дворыкаў, зь цемры выскачылі супрацоўнікі АМАП і пахапалі людзей, завялі ў «сінія бусы». Іншых людзей, якія хадзілі па вуліцы Савецкай малымі кампаніямі, таксама затрымлівалі ў розных месцах. Цяпер па Савецкай кружляюць аўтазакі і «сінія бусы».
Менск: АМАП адагнаў пратэстоўцаў да Зыбіцкай, людзей зноў зьбіваюць і затрымліваюць
У Менску АМАП адагнаў каля сотні людзей са сьцягамі зь вуліцы Няміга на Зыбіцкую, транспарт сыгналіць на знак падтрымкі. Людзі крычаць «Трыбунал!», АМАП бʼе пратэстоўцаў.
На вуліцу Зыбіцкую ў Менску прыбылі дадатковыя аўтазакі і аўтобусы, АМАП пабіў і затрымаў яшчэ некалькі чалавек.
На Нямізе быў перакрыты рух, утварыўся вялізны затор. Разганялі дэманстрантаў супрацоўнікі ГУБАЗіК МУС і асабіста іх начальнік Мікалай Карпянкоў.
Менск: на праспэкце Пераможцаў працягваюцца затрыманьні
На праспэкце Пераможцаў у Менску працягваюцца затрыманьні, АМАПаўцы бягуць у двары, выхопліваюць людзей. Калі пратэстоўцы на прыпынку «Палац спорту» спрабавалі адбіць аднаго з затрыманых, сталася сутычка, у выніку аднаму з пратэстоўцаў спатрэбілася мэдычная дапамога, да яго падышлі мэдыкі.
Спэцтэхніка зноў рушыла ў бок Палаца Незалежнасьці.
Менск: каля «Галерэі» сілавікі распылілі газ, каля стэлы зноў ужылі вадамёты
Каля гандлёвага цэнтру «Галерэя», калі пратэстоўцы паспрабавалі адбіць некалькіх затрыманых, сілавікі распылілі сьлезацечны газ, паведамляе «Эўрарадыё» ў жывым эфіры.
Тым часам каля Стэлы зноў ужылі вадамёты.
Горадня: АМАП працягвае затрымліваць пратэстоўцаў
Невялікая групка пратэстоўцаў пачала зноў скандаваць «Жыве Беларусь». Зьнянацку на іх выбеглі дзясяткі амапаўцаў і схапілі некалькі чалавек.
Нейкі мужчына некалькі разоў гучна выказваўся непрыстойна ў адрас міліцыянтаў. Пасьля гэтага пачыналіся затрыманьні.
Затрыманьні ў Віцебску
У Віцебску падчас аккцыі пратэсту таксама затрымлівалі людзей, паведамляе Белсат.
Шэсьце скончылася каля паловы на 21-ю. Людзі групамі зьнікалі ў дварах. Падчас разгону на праспэкце Перамогі былі затрыманыя як мінімум тры чалавекі. Журналістаў не чапалі. Сёньняшняе шэсьце суправаджала калёна зь дзясятка міліцэйскіх машын – аўтазакі, аўтобусы, мікрааўтобусы.
Менск: людзі працягваюць зьбірацца ў розных месцах гораду
Групы людзей працягваюць выходзіць і станавіцца ў ланцугі ўздоўж праспэкту Пераможцаў у Менску зь бел-чырвона-белымі сьцягамі, зьбіраюцца ў іншых месцах гораду. Аўтазакі ўсё яшчэ езьдзяць па праспэкце Пераможцаў, каб спыніць актыўнасьць пратэстоўцаў.
Менск: акцыі ў Серабранцы, Малінаўцы, на плошчы Якуба Коласа
Сілавікі брутальна разагналі пратэст у Менску пасьля інаўгурацыі Лукашэнкі. ФОТАГАЛЕРЭЯ
Сілавікі брутальна разагналі пратэст у Менску пасьля інаўгурацыі Лукашэнкі. ШМАТ ФОТА
Менск: АМАП разагнаў людзей у Новай Баравой
Горадня: зноў сабралася некалькі сотняў чалавек
Каля ГЦ «Карона» сабраліся некалькі сотняў чалавек. Людзі пачалі пляскаць у ладкі, скандаваць «Жыве Беларусь». Прыйшлі амапаўцы, некалькі чалавек затрымалі. Іншыя схаваліся.
Менск: каля «Галерэі» стаў «ланцуг салідарнасьці», прыехаў АМАП, зноў затрыманьні
Каля гандлёвага цэнтру «Галерэя» ўздоўж тратуару людзі выстраіліся ў ланцуг, а потым пайшлі ў бок цэнтру. Агулам некалькі соцень, перадае карэспандэнт Свабоды. Машыны сыгналяць на знак падтрымкі.
Сюды зноў пад'ехалі аўтазакі, выбеглі амапаўцы і пабеглі да «Галерэі». Людзей затрымліваюць.
АМАП разагнаў калёну на праспэкце, людзі вярнуліся ў «Галерэю», крычаць «Жыве Беларусь!». АМАП хацеў трапіць у гандлёвы цэнтар, але ахоўнікі іх не пусьцілі, зачынілі ўсе дзьверы.
Цяпер каля «Галерэі» працягваюцца адзінкавыя затрыманьні, у дварах «хапун».
Менск: на праспэкце Незалежнасьці праходзіць мітынг за Лукашэнку