Лінкі ўнівэрсальнага доступу

СК працягвае праверку па факце раненьня журналісткі «Нашай Нiвы». Справа не заведзеная


Параненая Натальля Лубнеўская (у цэнтры), 10 жніўня

Сьледчыя працягваюць праверку па факце раненьня, якое журналістка «Нашай Нiвы» Натальля Лубнеўская атрымала падчас асьвятленьня акцыі пратэсту ў Менску 10 жніўня.

«Сьледчымі працягваецца правядзеньне праверкі па факце траўмаваньня Натальлі Лубнеўскай», — паведаміла агенцтву Interfax афіцыйны прадстаўнік УСК па Менску Кацярына Гарлінская.

Яна дадала, што падчас праверкі была прызначана судова-мэдычная экспэртыза. «Чакаем заключэньня экспэртаў. Устанаўліваюцца ўсе абставіны здарэньня», — сказала Гарлінская.

10 жніўня ўвечары Натальля Лубнеўская працавала на вуліцы Кальварыйскай. Пазьней у сеціва выклалі відэа, на якім відаць, як побач зьявіліся дзясяткі байцоў, як мяркуецца, з атраду «Алмаз». Адзін зь іх прыцэльна стрэліў у журналістку, хоць тая была ў камізэльцы з надпісам «Прэса» і бэджам.

Цягам 38 дзён Натальля знаходзілася на стацыянарным лячэньні ў лякарні хуткай мэдычнай дапамогі. 16 верасьня яе выпісалі, а бальнічны ліст працягнулі ўжо амбуляторна, у паліклініцы.

Цяпер выданьню пагражаюць штрафам за тое, што своечасова не паведамілі пра здарэньне ў Белдзяржстрах і Інспэкцыю працы.

Крымінальную справу па факце раненьня журналісткі дасюль не завялі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG