«Марш справядлівасьці» ў Менску сабраў больш за 100 тысяч чалавек

20 верасень 2020, 20:23

Больш за 100 тысяч чалавек сабраліся ў Менску 20 верасьня на традыцыйную нядзельную акцыю, якая гэтым разам называлася «Марш справядлівасьці», паведамляе агенцтва БелаПАН. Такую ж колькасьць удзельнікаў дае агенцтва Reurters.

У Менску сілавікі актыўна перашкаджалі збору людзей на праспэкце Пераможцаў, але, нягледзячы на гэта да 15.00 у раёне стэлы «Менск — горад-герой» сабралася некалькі дзесяткаў тысяч дэманстрантаў. Да іх далучаліся людзі з прылеглых вуліц.

У выніку шматтысячная калёна зь бел-чырвона-белымі сьцягамі накіравалася да Палаца Незалежнасьці, аднак, убачыўшы кардон сілавікоў на падыходах да палаца, пратэстоўцы вырашылі зьмяніць маршрут. Яны накіраваліся ў бок цэнтру па вуліцах Ігнаценкі, Ціміразева, Кальварыйскай, Нямізе, Багдановіча, Купалы, Куйбышава, Харужай.

Як у Менску прайшоў статысячны «Марш справядлівасьці». ШМАТ ФОТА

Задоўга да пачатку маршу ўзброеныя сілавікі і спэцтэхніка атачылі галоўныя плошчы і стратэгічныя аб’екты. Салдаты каля манумэнту на плошчы Перамогі — 1/57 Задоўга да пачатку маршу ўзброеныя сілавікі і спэцтэхніка атачылі галоўныя плошчы і стратэгічныя аб’екты. Салдаты каля манумэнту на плошчы Перамогі

2/57 Кастрычніцкую плошчу па ўсім пэрымэтры абнесьлі мэталічнай агароджай, за якой групамі стаяць дзясяткі экіпаваных байцоў унутраных войскаў з аўтаматамі

4/57 На вуліцы Сапёраў пэрпэндыкулярна праспэкту Пераможцаў сканцэнтраваная спэцтэхніка розных відаў. Бадай, упершыню ўлады вывелі пазадарожнікі «Тыгр» з гарматамі на дахах

6/57 Сілавікі заблякавалі подступы да Палаца Незалежнасьці — рэзыдэнцыі Аляксандра Лукашэнкі — і будынку Вярхоўнага суду, куды мелася ісьці шэсьце

10/57 Вернікі зьбіраюцца на марш на плошчы Свабоды

12/57 Людзі спрабуюць сабрацца на Нямізе

13/57 Адразу зьяўляюцца аўтазакі з АМАПам, які пачынае затрымліваць людзей

15/57 Затрыманьні працягваюцца ля гандлёвага цэнтру насупраць Палаца спорту

19/57 І ўсё ж дэманстрантам удалося сабрацца каля стэлы. Па праспэкце Пераможцаў крочаць ужо дзясяткі тысяч

22/57 Від на стэлу з вышыні дае ўяўленьне пра маштаб пратэсту. У гэты момант людзі яшчэ зьбіраліся

24/57 Славутая баскетбалістка Алена Леўчанка размаўляе з калегамі-спартоўцамі

28/57 Народная творчасьць у сёлетніх пратэстах найлепей выяўляецца ў плякатах

31/57 Марш паўз вуліцу Ігнаценкі, якая злучае Ціміразева з праспэктам Пераможцаў

38/57 Спартовая калёна сярод дэманстрантаў

40/57 Кардон перакрыў вуліцу Янкі Купалы

41/57 Шэсьце па Нямізе на ўсю шырыню вуліцы

43/57 Шматтысячнае шэсьце мінае Траецкае прадмесьце

46/57 Людзі ля помніка Якубу Коласу трымаюць партрэты арыштаваных супрацоўнікаў ІТ-кампаніі PandaDoc

47/57 Сілавікі сталі ў кардоны са спэцтэхнікай на скрыжаваньні праспэкту Незалежнасьці і вуліцы Казлова, каб не пусьціць шэсьце да плошчы Перамогі

49/57 Частка людзей скіравалася па вуліцы Казлова, дзе адбыліся затрыманьні

Калёна на чале зь вядомымі спартоўцамі, якія несьлі расьцяжку «Народ — чэмпіён», некалькі разоў скіроўвалася ў бок блёку сілавікоў і сыстэмы «Рубеж» — 50/57 Калёна на чале зь вядомымі спартоўцамі, якія несьлі расьцяжку «Народ — чэмпіён», некалькі разоў скіроўвалася ў бок блёку сілавікоў і сыстэмы «Рубеж»

54/57 Некаторыя дэманстранты спрабавалі размаўляць зь сілавікамі, апэлюючы да Канстытуцыі

56/57 Урэшце людзі пайшлі ад скрыжаваньня з Казлова назад у бок плошчы Якуба Коласа. Па дарозе пачаліся затрыманьні. Жанчыне стала кепска, калі яна ўцякала ад АМАПу каля філярмоніі. Яе забрала хуткая

57/57 Плякат на агароджы Міністэрства абароны

Адметнасьць гэтага маршу — вялікая колькасьць удзельнікаў з новастворанымі сьцягамі раёнаў Менску. Лошыца, Малінаўка, Аўтазавод і іншыя — так людзі пазначаюць сябе ў калёне.

Некалькі разоў дэманстранты спрабавалі выйсьці на праспэкт Незалежнасьці, але ім перагароджвалі шлях сілавікі. У раёне плошчы Якуба Коласа калёне ўсё ж удалося выйсьці на праспэкт і прайсьці ад плошчы да скрыжаваньня з вуліцай Казлова. Там удзельнікаў маршу сустрэў кардон сілавікоў, аўтамабілі «Рубеж» і вадамёты.

Галава калёны зьвярнула ў бок Вайсковых могілак. Скарыстаўшыся гэтым, сілавікі разьбілі дэманстрантаў на дзьве часткі. У раёне вуліцы Зьмітрака Бядулі пачаліся затрыманьні. Паводле інфармацыі відавочцаў, людзей таксама затрымлівалі на праспэкце Незалежнасьці каля 23-яй гімназіі ў раёне ЦУМа, Белдзяржфілармоніі і ГЦ «Маскоўска-Венскі», каля казіно «Белая вежа».

Пасьля 19 гадзін, калі марш у Менску завяршыўся, ізноў запрацаваў мабільны інтэрнэт. Сёньня ён практычна адсутнічаў 4,5 гадзіны, з 14.35 да 19.05, «у адпаведнасьці з распараджэньнем упаўнаважаных дзяржаўных органаў», паведамляе БелаПАН. Прапускная здольнасьць мабільнага інтэрнэту прымусова зьніжаецца кожную нядзелю падчас акцый пратэсту.

Паводле зьвестак на 20.10, правааабронцам вядомыя прозьвішчы ўжо 90 затрыманых на маршы ў Менску і 50 чалавек — у рэгіёнах. Сьпіс затрыманых увесь час абнаўляецца.

Сёньняшні марш быў ужо шостым нядзельным маршам прыхільнікаў пераменаў пасьля прэзыдэнцкіх выбараў 9 жніўня. Людзі па ўсёй краіне патрабуюць адстаўкі Лукашэнкі і правядзеньня новых сумленных выбараў, вызваленьня палітвязьняў, а таксама прыцягненьня да адказнасьці сілавікоў за зьбіцьцё мірных дэманстрантаў і катаваньні.

Прыхільнікі пераменаў 20 верасьня таксама выйшлі на вуліцы Берасьця, Віцебска, Горадні, Гомля, Магілёва, Салігорска, Бабруйска і іншых гарадоў Беларусі.