Эўрапейскі парлямэнт падрыхтаваў рэзалюцыю па Беларусі, у якой пацьвярджае, што не прызнае вынікі прэзыдэнцкіх выбараў і што пасьля заканчэньня тэрміну паўнамоцтваў Аляксандра Лукашэнкі ня будзе лічыць яго прэзыдэнтам.
Эўрапарлямэнт падтрымлівае ідэю нацыянальнага дыялёгу пры дапамозе АБСЭ, заклікае арганізаваць пільнае расьсьледаваньне фактаў гвалту, правесьці новыя выбары з удзелам назіральнікаў ад БДІПЧ АБСЭ, а таксама рэкамэндуе Эўракамісіі:
- павялічыць фінансаваньне грамадзянскай супольнасьці Беларусі
- замарозіць трансфэры сродкаў Эўразьвязу дзяржаўным і падкантрольным ураду структурам
- спыніць пазыкі ўраду ад Эўрапейскага інвэстыцыйнага банку і ЭББР
- арганізаваць канфэрэнцыю донараў для дэмакратычнай Беларусі, дзе разгледзець «шматмільярдны фінансавы пакет» для падтрымкі будучых рэформаў
- заклікае прыпыніць зь Беларусьсю перамовы аб прыярытэтах эўрапейскага партнэрства
- стварыць гуманітарны калідор і спрасьціць выдачу візаў палітуцекачам і тым, хто мае патрэбу ў мэдычнай дапамозе пасьля гвалту
- распрацаваць у Эўропе адмысловую стыпэндыяльную праграму для студэнтаў, выключаных зь беларускіх ВНУ з палітычных матываў
- заклікае не праводзіць у Беларусі частку чэмпіянату сьвету па хакеі-2021.
Эўрапарлямэнт таксама выказвае заклапочанасьць тым, што ў часе вялікай палітычнай нестабільнасьці Беларусь ужо загрузіла ядзернае паліва ў першы рэактар Астравецкай АЭС і плянуе пачаць вырабляць энэргію ў лістападзе 2020 году.
Эўрапейскія дэпутаты папярэджваюць, што Аляксандар Лукашэнка ня мае палітычнага і маральнага мандату ўступаць у якія-небудзь далейшыя дамоўныя адносіны ад імя Беларусі, у тым ліку з расейскімі ўладамі, якія могуць пагражаць сувэрэнітэту і тэрытарыяльнай цэласнасці Беларусі.
Галасаваньне па рэзалюцыі адбудзецца заўтра а 14-й гадзіне паводле менскага часу.
